Tuesday, July 3, 2018

PANAGTALON ITI WET SEASON 2018, MAIGANGANNUAT

Cabugao, Ilocos Sur – Iti panakaisar-ong ti Web In-Action kadagiti barangay ti Munisipalidad, naammuan kadagiti mannalon a   main-inutanda  iti dati  a matalonda  a nasapa  iti  Wet Season  (Hunio-Nobiembre) babaen iti diskarteda iti pagpadanum. 

Maibasar iti tignay ti DA-LGU iti daytoy a panagtatalon ket kaaduan iti bilang ti mannalon a mangbukel iti  35 a rehistrado nga  asosasion iti naikkan ti pamalpalatpatan iti Cropping Calendar & Pattern of Planting iti Wet Season 2018 babaen iti maulit-ulit a meeting ken Technical Briefing ti Palay Check Session iti kada barangay/asosasion.

Imbatad dagiti mannalon a manam-ayan dagiti asosasion ta addaanda   iti pagsusublatanda a ramit a pagtalon kas iti hand tractor (kuliglig) iti kaaduan, hose ken makina (water pump)  a pagpakunot ti danum iti aminen nga asosasion babaen iti panangpataud  ti DA-RFO 1 ken ti LGU-Cabugao kadagitoy a pagimbagan dagiti mannalon ti ili babaen iti Farm Mechanization Program ti DA ken iti itutulong ti Gobierno Lokal ken Probinsial.

Dagitoy nga aksion ken inisiatiba ket resulta iti napintek a programa ti Gobierno Munisipal nga idauluan ni Mayor Josh Edward  S. Cobangbang  tapno makomplementaran ti gaget dagiti mannalon nga agpataud iti umanay ken agtultuloy a suplay a pagtaraon dagiti umili ken manayonan   ti masapulanda agsipud ta mayoridad dagiti umili ti agdepdepende iti kangrunaan a  pagbiaganda iti Agrikultura ditoy nga ili. 

Iti pakauna a report ti Municipal Agriculture Office ket addan 72 Ektaria a nairugi a naraepan iti ili ket manaynayonan ti bilang iti matalon iti masungsungad nga aldaw ken lawas. # (Web Situational Report)

No comments:

Post a Comment