Cabugao, Ilocos Sur – Naaramid ti Consultative Meeting maipapan iti pannakaipasdek ti Dam iti NIA-Gaco River Irrigation System a mamunganay idiay Barangay Cacadiran, Cabugao, Ilocos Sur iti Hulio 5, 2018 ket naangay ti panagtitipon iti Cabugao Cultural and Sports Complex a tinalantanan dagiti Opisiales ti National irrigation Administration (NIA)-Region 1; Ilocos Sur Irrigation Management Office (IMO); NIA-Gaco RIS; Opisiales ti Barangay ken kameng ti Irrigators Association (IAs) a masakupan daytoy a Sistema ti padanum agraman dagiti Opisiales ti LGU-Cabugao nga idauluan Mayor Josh Edward S. Cobangbang.
Iti Consultation Proper, nailawlawag ti pakasaritaan iti pannakaipasdek ti NIA-Gaco River Irrigation Project agraman kadagiti barangay a masakupan daytoy; dagiti naileppasen nga istrakturas ken pasilidades ken pannakapatibker dagiti asosasion ti mannalon a maserbian daytoy a Sistema ti padanum.
Nailawlawag pay dagiti proseso a maaramid iti pannakaaramid ti Main Dam ta mandato ti linteg a kasapulan iti Environment Compliance Certificate (ECC) iti panagoperar ti irigasion. Naibatad pay ti Feasibility Study ket kuna ni Engr. Adriano Amano, Irrigation Manager ti Ilocos Sur Irrigation Management Office a naka-base idiay Sta. Maria, Ilocos Sur a kasapulan pay iti pannakaisimpa dagiti rikititos a kas iti right-of-way; ECC ken pannakasolbar ti amin a problema ken pakaseknan iti pagsaadan ti Dam ken masakupanna a paset ti daga.
Innayon pay ni Irrigation Manager Amano a kasapulan ti pannakataming iti aspeto ti Teknikal; Sosio-Ekonomiko a pannakaadal agraman iti Environmental a pakaseknan isu a kinalikagumanda daytoy a konsultasion.
Nakikaysa ni Mayor Josh Edward S. Cobangbang iti daytoy a taripnong. Iti Mensahena, kinalikagumanna iti pannakatratar dagiti tumaud a pakaseknan iti pannakaidur-as ti NIA-Gaco tapno agballigi daytoy a proyekto a para iti pagsayaatan ti sapasap.
Nangipaay met ti Mensahena ni NIA Regional Director Engr. Vicente Vicmudo ti Region 1. Bugas ti Mensahena ti panagballigi daytoy a gannuat ditoy nga ili tapno sapasap nga agsagrap ti amin iti ibungana a panagprogreso nangruna iti panagpataudan ti pagtaraon.
Iti Open Forum, naikkan ti naan-anay a pannakasungbat dagiti timmaud a saludsod ken pakaseknan nangruna iti right-of-way (ROW).
Nagatendar ken nagsarita dagiti pannakabagi ti Environment Management Bureau (EMB) ti . Nagatendar met ni Mr. Tirso Savellano a pannakabagi ni Diputado DV Savellano kasta metten a nakipaset ni Municipal Engineer Crescencio Marcos C. Formoso iti ili ti Cabugao. # (Web In-Action)
No comments:
Post a Comment