Cabugao, Ilocos Sur – Babaen iti Bileg ti Administrative Order 2017-05 a pinirmaan ni Mayor Josh Edward S. Cobangbang, narebisar ti Designasion, Banner Program, ken Barangay Assignment dagiti dadduma nga Office Regular Personnel ti Municipal Agriculture Office nga idauluan ni Municipal Agriculturist Robert S. Savella iti kallabes a tawen.
Malaksid iti dati a trabaho dagiti kaaduan nga Agricultural Technologist, adda sumagmamano a panagbaliw a kas iti sumaganad:
Sinublat ni Mr. Nereo S. Daproza, AT, ti kina-Municipal Fisheries Coordinator idinto ta inallawat met ni Mr. Nathaniel B. Galamgam, AT, iti kina-Municipal Rice Program Coordinator nga iggem ni Mr. Daproza.
Trabahuen met ni Ms. Arceli Antonette S. Racho, AT iti akem ti Planning Report Officer ken MAFC Coordinator.
Dagitoy a pagrebbengan dagiti Agricultural Technologist (ATs) iti Municipal Agriculture Office ket mamantener ita a Tawen 2019, segun iti Municipal Agriculturist.
Iti biang met dagiti asosasion dagiti mannalon ken mangngalap, maibatay iti pannakiam-amad ti Web In-Action kadakuada, napintas unay kadakuada daytoy a parupa ti serbisio nga itultuloy ti nasao nga opisina tapno maipamaysada a maammuan dagiti pakaseknanda a mannalon a saanda a maitugot iti papanda iti opisinada gapu ta kasapulan met a maaksionan ti kasasaad dayta a pakaseknan iti barangayda.
Imbatad ti dadduma a Presidente ti asosasion a ditoy ita a mariknada ti kinaepektibo ti maysa a Teknisian a mangipatungpal iti programa iti Agrikultura agsipud ta kadakuada ket ti maysa nga “Extensionist” ket kasapulan a masansan a rummuar ken makilangen kadagiti mannalon a makasapul iti pannarabayda.
Innayon pay dagiti mannalon ken mangngalap nga epektibo dagiti mairubuat a programa ken proyekto ti DA-LGU a mangitag-ay ti kasasaad dagiti klienteda a mannalon ken mangngalap tapno mayagpang iti serbisio a kalikaguman a tun-oyen ti Gobierno Munisipal nga idauluan ni Mayor Josh Edward S. Cobangbang para kadagiti umili. # (Web In-Action)
No comments:
Post a Comment