Cabugao, Ilocos Sur – Mairaman latta met a gay-at ti Gobierno Munisipal nga idauluan ni Mayor Josh Edward S. Cobangbang ket iti pannakatakuat dagiti maipanawen, nabiit, ken na-presio a klase ti maimula dagiti mannalon nangruna iti “off-season” babaen iti panangipatungpal ti DA-LGU iti kada panagmumula tapno manayonan ti matgedan dagiti mannalon ken mapapintas ti presio iti balanse a kaadu ti produksion.
Maysa ti mais a nabiit, kasapulan iti merkado ken eco-friendly a mairagragpin a maimula ditoy Ilokos. Ti Agri-Pinoy Corn Program ket naipatpatungpal ti Departamento ti Agrikultura (DA) ken babaen ti DA-LGU ket adda latta deretso nga agmulmula ti yellow ken white corn kadagiti kaaduan a Barangay ti ili a Cabugao, Ilocos Sur.
Umabot iti 300 ektaria iti mamulmulaan iti amarilio a mais ken 30 ektaria met ti puraw ti klasena a mais iti Dry Season (Nobiembre-Mayo). Nupay kasta, adda met latta agmula nangruna iti bangkag iti Wet Season (Hunio- Nobiembre) ta pagsaramsam ken iti kabiit ti puraw a mais ket mabalinda pay a paglako a nayon ti matgedan dagiti mannalon.
Malaksid kadagiti Corn Traders a mangpapigsa iti merkado ken industria ti mais, adda pay ti agtultuloy a programa ti Provincial Government a naipatungpal iti kada ili ti Probinsia ket mapagtalinaed ti Floor Price a makatulong unay kadagiti mannalon ken karkardayo a pakalugianda.
Nupay kasta, ti puraw a mais ket saan a nakadadanag ta nataray a lakuen ta para pay iti konsumo ti kaaduan.
Kabayatanna, maysa a prayoridad ti Gobierno Probinsial ken Lokal iti panagpamula ti mais agsipud ta nakasapulan iti industria ti panagtaraken ti baboy ken manok ken mabalin a pagsulnit ti mais a pagtaraon no bumassit ti suplay ti bagas. # (Web Situational Report)
No comments:
Post a Comment