Thursday, June 23, 2016

BUKEL TI NATENG A MAIMULA, INTED TI HVCDP-REGION 1

Cabugao, Ilocos Sur – Iti panangimaton ti High Value Crops Development Program (HVCDP)-LGU Cabugao  ken ti DA-RFO 1, mangipaayda manen  iti nailata ken nai-sachet nga agduduma ti klasena a  bukbukel. Naitalek dagitoy a bukel   ken ni Mrs. Ester P. Aguimbag, HVCDP Coordinator ti LGU-Cabugao tapno maited  kadagiti maseknan a mannalon a makasapul iti imulada.



Babaen itoy, manamnama a saan a mapasamak ti panagkirang ti suplay ti  nateng iti NISTC Public Market iti Tawen 2016  gapu ta adda latta maprodukto dagiti Off-Season Planters nangruna iti lugar a masasao a “Vegetable Bowl” ti ili nga isu ditoy  ti Brgy. Salapasap.



Nupay kasta, kuna ni Mrs. Aguimbag a posible nga imasetasda iti Municipal Greenhouse  ti kaaduan kadagiti nadakamat a bukel tapno ditoy a kumiddaw dagiti dadduma a Vegetable Growers no agmuladanto ket mapatuladanda no kasano ti agimasetas iti hybrid a bukel ti nateng.



Nakikaysa  ni Mayor Edgardo “Ediboy” S. Cobangbang, Jr. kasta metten ni ABC President Thaddeus U. Soller iti pannakaited dagiti nagduduma ti klasena a bukel kadagiti Vegetable Growers iti 2nd Floor, Municipal Building iti Hunio 22, 2016.




Innayon ni Mayor Ediboy a kasapulan koma a masustener ti kasasaad ti tunggal mabukel nga asosasion babaen iti  panangpadakkel dagiti mannalon dagiti maited a pundo ken puonanda nga agmula.



Kasapulan pay koma nga adda napintas a panagkammayet dagiti Opisiales ti Barangay ken Asosasion a pakaibilanganda iti tunggal barangay tapno agtinnulongda a mangpaadu ti kameng ket sapasap a mabenepisiaran ti amin a mannalon nga agnanaed iti dayta a barangay. 



Kabayatanna, impeksa ni ABC President Soller iti dakkel a tulong a maited kadagiti mannalon iti daytoy a sumaruno nga administrasion ti ili. Paset ti pormula ti balligi nga imbatadna ti panangadalda no kasano a mapagmiembro ti amin a mannalon tapno matun-oyan ti husto a panggep iti pannakaited ti serbisio iti Sektor-Agrikultura.



Indariragna pay iti pannakipaset ti Presidente ti Asosasion iti maangay a Sesion ti Konseho ti Barangay tapno itdenna ti report a pakaammuan ti sasaaden ken turongen dayta nga asosasion.  # (Web In-Action)

No comments:

Post a Comment