Cabugao, Ilocos Sur – Maiganggannuat ita ti Farmer’s Field School on Sustainable Rice Production Project with Emphasis on Palay Check kadagiti 30 a mannalon ti Barangay Bungro babaen iti panagbinnulig ti Department of Agriculture, Regional Field Office (DA-RFO 1), San Fernando City, La Union; OPAG-Ilocos Sur ken ti Local Government Unit (LGU)-Cabugao, Ilocos Sur iti panangidaulo ni Mayor Edgardo “Ediboy” S. Cobangbang, Jr.
Segun ken ni Acting Municipal Agriculturist Robert S. Savella, dagiti sumaganad ti panggep daytoy a programa ket itultuloyda ita a Tawen 2016:
1. Pananggun-od ti kabaelan dagiti mannalon iti panagpatanor ti pagay babaen iti aktual a kapadasan manipud iti panagbunubon agingga iti panagapit.
2. Panangadalda ti amin nga aspeto iti panagtan-ay ti pagay tapno umadu ti maapit.
3. Panangbaliwda ti kadaanan a wagas ti panagmula ti pagay ket aramiden ti kabaruanan a takuat a mangingato ti matgedan.
4. Mangipasigurado ti 15% a ngatuan ti apit kada panagtalon ken 5% ti tinawen.
5. Panangpapigsada ti gimong ti mannalon ken panangnayon ti kabaelanda nga agmanehar iti naimulada a pagay.
Dagiti kangrunaan a pagsentruan ti panagadal ket iti naisibar a 5,000 metro-kuadrado a learning field a pakaipakatan iti 5 a Treatment iti uppat a klase ti pagay: Arize Bigante; Frontline Gold, NSIC Rc222 ken ti NSIC Rc 300.
Maaramid ti panagadal iti 16 a lawas. Nagrugi ti panagadalda iti umuna a lawas ti Hunio 2016 ket aggraduardanto inton 3rd Week ti October 2016.
Buklen dagiti Lecturers da Mr. Henry B. Saliganan ken ni Mr. Bert P. Vicente, agpada a Local Farmer Technician (LFT) ken tarabayen ida ni Mr. Obas Bill Y. Baclig, Supervising AT.
Iti biang ni Acting Municipal Agriculturist Robert Savella ti DA-LGU, pinaregtada dagiti mannalon ti Barangay Bungro nga ikagumaananda koma nga adalen ti maited a baro a teknolohia ti panagtalon ket iyallatiwdanto iti padada nga agtaltalon para iti sapasap a pagririnnanudan.
Pinagyamanan pay ni Mr. Savella ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken ti DA-RFO 1 nga idauluan ni Regional Executive Director Valentin C. Perdido, Ph. D., ta maikkanda iti kastoy nga adal a mangiyintek iti napintas a pagbanagan iti mulada a pagay.
Malaksid kadagiti kabaruanan a teknolohia a masagsagrap ti Bungro FA, karamanda met kadagiti asosasion ti mannalon iti programa ti LGU-Cabugao a nakagun-od iti ramit ken makinaria iti panagtalon para kadagiti Asosasion. # (Web In-Action)
No comments:
Post a Comment