Cabugao, Ilocos Sur – Naangay ti Regular Meeting dagiti kameng ti Cabugao Federated Farmer’s Association itay nabiit iti 2nd Floor, Municipal Building, Cabugao, Ilocos Sur.
Indauluan ni Mr. Elmer G. Bromeo, Federated President dagiti nagmiting a Presidente ken timmulong ti pannakabagi ti DA-LGU babaen ken ni Mr. Nathaniel B. Galamgam, Municipal Farmers’ Association Coordinator.
Nagatendar ni Mayor Edgardo “Ediboy” S. Cobangbang, Jr. Kimmablaaw ken nagyaman ta agtultuloy nga naurnos ken naregta dagiti Opisiales a mangibagbagi iti mayoridad a benneg ti umili: ti Sektor-Agrikultura. Impeksa ti Ama ti Ili iti pammatina a maragsakan ken malag-anan dagiti mannalon kadagiti mait-ited kadakuada a serbisio, pasilidad ken ramramit iti Agrikultura ken kangrunaan ket iti panangpadakkelda iti naited kadakuada a pangrugianda a pundo a maiserbi iti dagupda a miembro.
Dagiti sumaganad pay a pakaseknan iti tinamingda:
1. Naammuan babaen kadagiti pangulo ti Asosasion a napintas iti nagdur-asan iti pannakaited dagiti bukel ti Hybrid Rice (Pay Now Pay Later) a naited itay nabiit kadagiti makasapul a kamiembruanda. Nupay kasta, adu met latta iti agbunubon iti Inbred ket dagiti saaan a nakabagi ket manamnama a maikkandanto iti sumaruno a maited a Ryan Rice Seeds.
2. Na-update ti pagdurdur-asan ti serbisio ti Philippine Crop Insurance Corporation (PCIC) kadagiti nasakupan a mannalon iti napalabas a panagtatalon (Dry Season 2015-2016).
3. Nataming iti pakaseknan ti produksion ti mais.
4. Natratar pay dagiti pakaseknan ti Asosasion, programa ken proyekto nga agtyultuloy nga isayangkat ti DA-LGU kadagiti mannalon iti 33 a barangay ti Munisipalidad. # (Web In-Action)
No comments:
Post a Comment