Cabugao, Ilocos Sur - Maipampamaysa ita ti panangdanon dagiti Staff ti DA-LGU Cabugao nga idauluan ni Acting Municipal Agriculturist Robert S. Savella kadagiti mannalon (by schedule) iti 33 a barangay ti Munisipalidad ti Cabugao tapno tulonganda ti PCIC Staff a mangpapirma kadagiti kasapulan a papeles iti pannaka-insure dagiti mulada a pagay ita a Wet Season 2016 (Hunio-Nobiembre).
Nangrugi ti nasaknap a trabahoda ita a bulan ti Hunio 2016.
Sakbayna, impadamag ni Mr. Savella nga awan ti rimsua a problema iti panangaksion ti PCIC kadagiti pakaseknan dagiti mannalon itay Dry Season 2015-2016 (Disiembre-Mayo) ta nabayadan amin a “crop damages” a napabisita ken naipinal babaen iti panagtitinnulong dagiti maseknan a mannalon, Staff ti DA-LGU ken dagiti Adjuster ti PCIC nga adda iti babaen ti Departamento ti Agrikultura (DA).
Innayon pay ni Mr. Savella a manamnama met a 50% ita ti agkameng iti PCIC iti dagup ti dandani ag-5,000 a bilang ti mannalon ket ad-adu ti maiserrek a matalon nupay saan met a maidawdawat iti idadateng ti kalamidad a kas iti bagyo ken layus.
Dagitoy nga aksion ken inisiatiba ket resulta iti nakammayet a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken iti DA-RFO 1-PCIC tapno matulongan ti kasasaad dagiti mannalon/umili iti pannakaital-o ti kasasaad ti panagbiagda babaen iti mainayon a matgedanda iti panagpatanoran ti pagay. # (Web In-Action)
No comments:
Post a Comment