Cabugao, Ilocos Sur – Maar-aramid ti inaldaw a panagagas dagiti Medical Personnel (Doktor, Nurse, Midwives, Dentist ken RN-Heals Nurses iti Rural Health Unit-Cabugao kadagiti umili ti 33 a barangay ti Cabugao, Ilocos Sur.
Babaen iti naregget a programa ti DOH kadagiti RHU kadagiti LGUs, agtultuloy ti panagserbisio dagiti RN-Heals Nurses kabayatan a maaramid ti Evaluation nga isayangkat ti LGU-Cabugao ket maipabaro ti kontrata ti serbisioda, segun ken ni Ms. Janet Sison, Public Health Nurse ti RHU-Cabugao, Ilocos Sur.
Innayon ni Ms. Sison nga outreach wenno mapan kadagiti barangay station ti kaaduan a trabaho ita dagiti RN-Heals Nurses tapno masupusopan dagiti dadduma pay a serbisio a kasapulan dagiti umili iti aw-away.
Iti biang ti Community Health Team (CHT) iti Barangay, ar-aramiden met dagiti pannakabagi ti Team iti pagrebbenganda ket mapagkaykaysa ti reportda a maited iti RHU-Cabugao para iti pannakainayon ken pakaammuan ti Municipal Health Office (MHO-Cabugao) nga idauluan ni Dr. Bernardino P. De Gracia III, OIC Municipal Health Officer iti kasasaad dagiti kakaduada nga agtartarabaho iti benneg ti salun-at kadagiti barangay.
Dagitoy nga aksion ken inisiatiba ket resulta iti napintas a koordinasion dagiti maseknan nga Opisina iti salinong ti LGU-Cabugao nga idauluan ni Mayor Edgardo ”Ediboy” S. Cobangbang, Jr. para iti agtultuloy a pannakaidur-as ti salun-at dagiti umili ti Cabugao, Ilocos Sur ita a Tawen 2016. # (Web In-Action)
No comments:
Post a Comment