Cabugao, Ilocos Sur – Maisagsagana manen a mamulaan ita a Tawen 2016 iti agduduma ti klasena a nateng iti ruar ken uneg ti dua a Greenhouse a kukua ti Munisipio.
Daytoy a pagmulaan ket napataud babaen iti lungalong ken agtultuloy a panagkammayet ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken iti DA-RFO 1.
Segun ken ni Mr. Obas Bill Y. Baclig, AT, Municipal Greenhouse Caretaker, a nadanonen ti panagtutudo a bulbulan ket rugianda nga isagana ti Greenhouse ket agibunubonda ti nagduduma ti klasena a nateng tapno maiparang iti umisu a panagpatanoran ti nateng ken maikkan dagiti agkasapulan a mannalon a mangnayon iti pagbiaganda iti panagmulada kadagiti hybrid a nateng a nadaras a pagkakuartaan.
Kadua ni Mr. Baclig nga agasikaso iti Greenhouse dagiti Job Order Personnel iti Munisipio. Maimula dagiti naitiempo a nateng tapno mapagaget dagiti mannalon no adda makitada a tuladenda.
Iti kallabes a Cropping Season, naballigi ti pannakaidemonstrarna babaen met laeng iti panagtinnulong da Mr. Obas Bill Y. Baclig, AT ken dagiti kakaduana nga agas-asikaso.
Dagitoy nga aksion ken inisiatiba ket resulta iti napintek a programa ti Gobierno Munisipal a mangipakat kadagiti teknolohia nga ited ti DA-RFO 1 babaen iti HVCDP-LGU Cabugao nga imatonan ni Mrs. Ester P. Aguimbag, AT, tapno saan a maudi dagiti mannalon ditoy a Munisipalidad iti produksion ti nateng. # (Web Situational Report)
No comments:
Post a Comment