Cabugao, Ilocos Sur – Malaksid iti inaldaw a panagagas dagiti Medical Personnel (Nurse, Midwives, Dentist ken RN-Heals) iti Rural Health Unit-Cabugao ket maar-aramid met ti panagtignay ti sanga ti serbisio kadagiti 33 a barangay ti ili a Cabugao, Ilocos Sur babaen kadagiti RN-Heals Nurses a mapan kadagiti Barangay Health Station a nakaeskediulanda iti inaldaw.
Imbatad dagiti RN-Heals Nurses a kaduada dagiti Barangay Health Workers (BHWs) ken dagiti Opisiales ti Barangay a mangtaming kadagiti dumanon a pasiente a kas iti panagbakuna kadagiti ubbing, masikog ken nataengan. Innayonda a mabalinda met ti
agited iti agas (tableta) iti alta presion kadagiti matakuatan a nangato ti Blood Pressure-da.
Iti biang met ti Community Health Team (CHT) iti Barangay ket ar-aramidenda dagiti reportda a maited iti RHU-Cabugao para iti pannakainayon ken pakaammuan ti Municipal Health Office (MHO-Cabugao) nga idauluan ni Dr. Bernardino P. De Gracia III, OIC Municipal Health Officer iti kasasaad dagiti pasiente ken dagiti kakaduada nga agtartarabaho iti benneg ti salun-at kadagiti barangay.
Dagitoy nga aksion ken inisiatiba ket nagubuay babaen iti napintas a koordinasion dagiti maseknan nga Opisina iti salinong ti LGU-Cabugao nga idauluan ni Mayor Edgardo ”Ediboy” S. Cobangbang, Jr. para iti agtultuloy a pannakamantener ti napintas a salun-at dagiti umili ti Cabugao, Ilocos Sur. # (Web In-Action)
No comments:
Post a Comment