Cabugao, Ilocos Sur – Naangay ti Pay-out wenno pannakaited ti Social Pension ti 680 a Beneficiaries (babbaket ken lallakay) a kameng ti Senior Citizens ti ili a Cabugao ket inawatda ti 2nd Quarter ti 2016 (Abril-Hunio) a pensionda manipud iti DSWD RFO 1. Naangay ti Pay-out iti Cabugao Cultural and Sports Complex, Barangay Rizal, Cabugao, Ilocos Sur idi Hunio 21, 2016.
P500 ti kada bulan ti naituding nga awaten ti maysa a Beneficiary.
Pakabuklan ti tallo a bulan (P1,500) ti naawatda iti tunggal maysa ket agdagup iti P1,020,000 ti dagup ti naited kadagiti nag-pension a nataengan a naggapu kadagiti barangay ti ili.
Indauluan ni Mrs. Lydia S. Gazmen, Municipal Social Welfare Development Officer dagiti kakaduana a nangtarabay kadagiti Pay-out Team ken kadagiti nataengan nga immay nangala ti pensionda ditoy Complex.
Nagatendar ni Mayor Edgardo “Ediboy” S. Cobangbang, Jr. kasta metten ni Incoming Mayor Josh Edward “Ediboy” S. Cobangbang, a tinarabay dagiti Konsehales ti Ili nga isuda SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; ABC President Thaddeus U. Soller; SBM Jayhan Alcid-Tan; ken ni SBM Atty. Bryan Jett S. Pano.
Kimmablaaw ken nagyaman ni Mayor Ediboy iti amin a nagatendar iti Pay-out. Bininsana ti pateg ti panagbalin a nataengan ti tunggal maysa ken dagiti maited a pribilehio kadagiti Senior Citizen. Innayon ti Ama ti Ili nga ulitenna ti agyaman kadagiti nataengan ta maibilangda kadagiti sektor a nakikamkammayet kenkuana manipud iti pannakaisaadna iti poder ken kabayatan ti innem a tawen a panagtakemna a Mayor ti ili. Kayatna nga ipasagepsep iti amin nga umili ti Cabugao iti pateg ti panangasikaso kadagiti nataengan ta agbalin a nataengan ti amin a tao ken kayatna a manaynayonan dagiti programa a maited a pagsayaatan dagiti Senior Citizen babaen iti sumaruno nga Administrasion tapno ad-adunto met ti sagrapen dagiti masakbayan a lumallakay ken bumabbaket.
Insupusop pay ti Ama ti Ili a kasapulan koma nga apaman a magtengan ti tawen nga ag-senior citizen ti maysa nga umili iti edad a 60 ket masagrapnanto daytoy a social pension tapno ad-adu ti mabenepisiaran ken nalawlawa ti masakupan ti programa ti DSWD a kapartner ti LGU.
Impeksa pay ti Alkalde Munisipal a dagiti Senior Citizen iti ili ti Cabugao ti kalalaingan kenkuana a nataengan iti intero nga Ilocos Sur.
Nangted met ti mensahena ni Incoming Mayor Josh. Kimmablaaw ken nagyaman iti amin iti suportada kenkuana a mangrienda iti ili. Impanamnamana nga aramidenda ti kabaelanda ken agtrabahoda kadagiti Konsehales ti ili iti pannakapaadda kadagiti mainayon a pagsayaatan ken serbisio kadagiti nataengan a pakairamananto iti kaaduan iti masakbayan. # (Web In-Action)
No comments:
Post a Comment