Cabugao, Ilocos Sur – Kabayatan nga agdakdakiwas ti napigsa a tudo a buybuyogan ti napigsa nga angin ti Bagyo Odet iti Kailokuan, nagtignay dagiti kameng ti Municipal Disaster Risk Reduction Management Council-MDRRMC-LGU Cabugao a nagrekurida iti Poblasion ken kangrunaanna kadagiti barangay a prone (masansan a madidigra) ti kalamidad nangruna iti layus, landslide ken panagkurukor ti dalan ken kanaigna a pakaseknan.
Iti report nga imparuar ti MDRRMC ita a Setiembre 23, 2013, awan ti nakaro a naapektaran a tao wenno lugar ditoy Cabugao iti daytoy nga immablat a bagyo ta nasaganaanda dagiti umili kasta met iti MDRRMC ken BDRRMC sakbay ti idadatengna babaen kadagiti adelantado a ramit-komunikasion kas iti TV, Radio, Social Network ken Hotline ti MDRRMC.
Kabayatanna, imbatad ti Opisina ti DA-LGU Cabugao nangruna iti Municipal Rice Program Coordinator a saanda a masinunuo pay laeng ti epekto ti nakaro a tudo ken angin ti Bagyo Odet kadagiti mula a pagay ngem manamnama nga ad-adun ti nakalasat a mula a pagay a masagsagana a maapit iti panagsayaat ti tiempona iti masanguanan nga aldaw. # (Web In-Action)
No comments:
Post a Comment