Wednesday, September 18, 2013

DADDUMA PAY A GAPUANAN TI MDRRMC

Cabugao, Ilocos Sur – Iti pannakiuman ti Web In-Action idi Setiembre 17, 2013, imbatad ni Engr. Nestor B. Somera, Waterworks Superintendent ken agak-akem a dadaulo ti Municipal Disaster Risk Reduction  Management Council (MDRRMC)  nga adu pay dagiti bambanag a nagapuananda a nangikanawa ti ad-adu a pakadidigraan ti  sapasap kas iti sumaganad:

1.Panagaksionda a dagus iti pannakatumba ti Firetree iti asideg ti Kalsada Nasional iti Barangay Pug-os iti napalabas a bulan.

2.Panangirekomendada  iti MENRO iti panangtingitingda itan   kadagiti nagrukaben a pinuon ti duduogan nga akasia iti igid ti kalsada. Pagbasaran  iti maysa a dakkel a pinuon a natumba  a pettat idiay igid ti Highway iti Sitio Cabaruan, Brgy. Cuancabal, Cabugao,  Ilocos Sur. Inaksionanda a daras ti pannakaipakni daytoy a pinuon ti acacia  tapno saan a makasali iti igid ti dalan. 

3.Pannakaduktal itay nabiit ti apon dagiti reprep a  Dengue Larvae a posible a nangpakaro ti Dengue Outbreak no di naatipa.

4.Pannakasolbar ti krisis  ti mainum ken mausar a danum a maibilang ti epektona a kas katimbeng ti kalamidad no di masolbar.

5.Panagaksion ken panangadalda no kasano a maikanawa ti maapektaran  kadagiti mapasamak a nakaro pay  a landslide kas iti Sitio Balaywak, Pug-os ken nagbeddengan ti Brgy. Cael-layan ken Brgy. Bato idi katudona a bulan.

Kanaig daytoy, nagmiting dagiti kameng ti MDRRMC idi Setiembre 17, 2013 iti Municipal Conference Building tapno mareorganisar wenno mapunnuan dagiti  bakante nga opisiales ken mabukel ti 6-Year MDRRMC Plan a pakabuklan dagiti napapateg nga aktibidades ti Konseho pakaseknan iti panangannurot iti ituyang ti NDRRMC a maipatungpal iti masakupan a lokalidad wenno barangay   a kangrunaan a mapokusan iti atension no dumteng ti aniaman a kalamidad ita ken iti masakbayan. # (Web In-Action)

No comments:

Post a Comment