Cabugao, Iloco Sur – Madama a maitartarabaho ti pannakanayon ti Flood Control System ti sidiran ken paset pay laeng ti Quezon-Alina-ay Road a mabatogan ti Cabugao River babaen iti panangilungalong ti Gobierno Lokal ti ili a Cabugao, Ilocos Sur.
Maar-aramid ti Gabion Wire tapno agwara ti danum no tuparen ti ayus ket malunitan inton agangay ti iniket a barut nga agbalin a nasiken a sarapa ti umay a layus. Daytoy a proyekto ket ipatpatungpal ti DPWH-1st Engineering Office, Ilocos Sur.
Kanaig daytoy, naigannuat sakbayna ti re-channeling ti ayus ti karayan babaen ti makinaria ti Munisipio tapno saan a dumupir ti ayus iti disso a pakaar-aramidan ti istraktura a tiped ti layus nangruna ita a matutudo a bulbulan ti Tawen 2013.
Dagitoy a gannuat ket paset ti panangisagana iti umisu nga istraktura kas iti Flood Control System babaen ti panangitandudo ti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno maliklikan ti panagreggaay ti kalsada a matupar no dumakkel ti ayus ket saan a mamolestia ti panagdaliasat ti sapasap a magmagna kadaytoy a kalsada ti ili. # (Web In-Action)
No comments:
Post a Comment