Cabugao, Ilocos Sur – Agtultuloy a maipatungpal ti pakabuklan ti Environmental Management Program ti LGU-Cabugao babaen ti panakabisita dagiti naitultuloy a naaramid a Material Recovery Facility (MRF), Nursery-Tree Park, Herbary, Backyard Gardening (Gulayan) ken Compost Pit iti 33 a barangay ti Munisipalidad babaen ti panangimaton ni MENRO Edgar S. Balangatan, AT/LGU-Cabugao.
Iti pannakiuman ti Web In-Action itay nabiit, impakaammo ni MENRO Balangatan a sumagmamano laengen a barangay ti saan a nakapagtungpal iti pannakakompleto kadagitoy a maaramid a pakabuklan ti programa.
Kanaig daytoy, nakikaysa dagiti barangay iti naaramid a Tree Planting Activity nga inyuna ti LGU-Cabugao itay napalabas a panagtutudo a bulbulan ken kasta met a nagmulada iti Giant Ipil-Ipil ken Manila Palm (Butchina) a kangrunaan nga indagadag ti Hepe Ehekutibo ti LGU-Cabugao a maimula kadagiti barangay ken pampubliko a lugar.
Innayon ni MENRO Balangatan nga agtultuloy a monitorenda ken ti grupona iti 33 a barangay tapno makompletoda dagitoy a pagrebbenganda babaen ti panangiwardas dagiti Opisialesda.
Dagitoy nga aksion ken inisiatiba ket resulta ti napintek a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. para iti sustenable a pannakasaluad ti aglawlaw ken dagiti umili. # (Web In-Action)
No comments:
Post a Comment