Cabugao, Ilocos Sur – Iti pannaki-amad ti Web In-Action iti Hulio 8, 2014, impakaammo ni Dr. Bernardino M. De Gracia III, OIC Municipal Health Officer ti ili a Cabugao nga adda mausar a 500 a Pakete ti OP Trap ken 2,000 ti Sumilarv, dua a klase a pangtiped iti Dengue Virus iti lokalidad tapno saan a maapektaran dagiti umili iti Cabugao nangruna kadagiti ubbing a kagaten ti lamok a Dengue Carrier.
Inulit latta ni Dr. De Gracia ti panagan-annad iti maysa nga indibidual tapno saan a makapet kadagiti sakit iti panagbaliw ti klima kas iti panateng, uyek, gurigor, trangkaso ken kanaigna a sakit ti bagi. Imbatad ni Dr. De Gracia a no makarikna ti tao iti sagubanit nangruna kadagiti maladaga ken ubbing ket dagus koma a maipakita iti mangngagas ken saan koma nga itantan wenno padasen nga agasan babaen iti kabukbukodan a wagas.
Ipalpalagip pay ti Doktor a kangrunaan koma a maaramid iti agtultuloy a panagdaldalus iti bagi, pagtaengan ken iti arubayan, panagehersisio iti inaldaw, pannangan iti balance-diet, aginana kas iti umdas a pannaturog, liklikan ti sobra a panagbannog, ikkan ti panawen ti panagrelaks/recreation ken dadduma pay nga annuroten para iti naamnut a salun-at tapno mamantener iti panagtrabaho ti immunity system (salaknib a manglaban iti sakit).
Dagitoy nga aksion ket maigapu iti agtultuloy a panag-partner ti LGU-Cabugao ken ti Ahensia ti DOH iti pannakaidur-as ti programa/proyekto para iti salun-at/sanitasion dagiti umili. # (Web In-Action)
No comments:
Post a Comment