Cabugao, Ilocos Sur – Naiwaras dagiti mabatayan dagiti Barangay Health Workers (BHW’s) kadagiti 33 a barangay ti ili a Cabugao, Ilocos Sur nga OV-Trap iti uneg ti Rural Health Unit (RHU)-Building idi Hulio 15, 2014 ket timmulong ni Mrs. Fortunata “Naty” Castillo, Presidente ti Gunglo dagiti BHW’s iti ili kadagiti Personnel ti RHU-Cabugao a nagiyawat ti pakabuklan dagiti pangkontra ti Dengue.
Inimatangan da SB Member Atty. Bryan Jett S. Pano, Committee Chair on Health ken ni SBM Dr. Jemaima Soller-Tan Yee, Committee Vice Chair on Health agraman ni SBM Benedicto M. Savellano iti pannakaiwaras dagiti mausar para iti anti-dengue.
Sakbayna, nangted ti briefing ni Dr. Bernie M. de Gracia, OIC Municipal Health Officer kadagiti BHW’s a nagatendar iti nasao nga OV-Trap Distribution ket ingunamgunamna iti umisu a pannakaiyusar dagitoy a pangtiped ti panagadu ti lamok.
Pinagyamanan pay ti Doktor dagiti kameng ti Konseho Munisipal kasta met da Mayor Ediboy ken ni Vice Mayor DJ iti agtultuloy a pannakikammayetda iti DOH Region 01 ken iti Provincial Health Office iti pannakibinnadang ni Mr. Benjie Castillo nga Opisial iti nasao nga Opisina.
Nangited met ti pammalagip ni SBM Pano kadagiti Barangay Health Workers (BHW’s) iti panangsurotda iti proseso iti panangusar dagiti naited kadakuada ket kuna ti Konsehal a di koma bumdeng dagiti agipatungpal nga umasideg ken agpatulong iti RHU no kasapulanda idiay barangay. # (Web In-Action)
No comments:
Post a Comment