Cabugao, Ilocos Sur - Naangay ti maikadua nga aldaw (Hulio 8, 2015) a maikadua a bansada a pannakaaramid ti Community Core Group (CCG) Formation kadagiti Parent Leaders ti 4 P’s, Barangay Nutrition Scholar (BNS), Barangay Kagawad (Committee Head on Social Services) iti 19 a barangay ti ili a Cabugao iti Municipal Conference Hall.
Iti Day 2, Hulio 8, 2015, naangay ti Opening Program ti nasao nga aktibidad iti Conference Hall.
Nangipaay ti Welcome Address ni SBM Atty. Bryan Jett S. Pano, Committee Chairman on Social Services.
Kimmablaaw ken nagyaman ti Konsehal kadagiti timmabuno iti nasao a taripnong. Dinakamat ti Abogado iti pateg dagitoy a maited a panagsanay ket mainayon manen a pagimbagan ti itdenna kadagiti umili ti Cabugao.
Nangipaay met ti Inspirational Message ni Mayor Edgardo “Ediboy” S. Cobangbang, Jr. Kimmablaaw ken nagyaman ti Ama ti Ili kadagiti nagatendar nga agseminar, Opisial ti DSWD, Konseho Munisipal ti ili ken dagiti Staff ti MSWDO nga idauluan ni MSWD Officer Mrs. Lydia S. Gazmen ta ammo dagiti kailianna a probitsaren dagiti maikanatad a serbisio a para iti pagsayaatanda.
Impeksa ti Ama ti Ili iti ragsakna ta iti ili ti Cabugao latta ti umun-una a mapili a pakaipatungpalan dagiti programa ti Ahensia kas ita iti Sustainable Livelihood Program ket inanamaenna a dagiti mapagasatan ita a pakaitedan ti adal ken sursuro ket maiyallatiwda kadagiti dadduma a kailianda ket maisarsarming latta met ditoy iti hushusto nga implementasion kadagiti kakastoy a programa a para iti sapasap ditoy Cabugao.
Inulit ni Mayor Ediboy nga awan ti pangisukatanna kadagiti kakastoy a programa ket saanda nga agpabatubat a mangsuporta ken mangyimplimentar kadagiti kakastoy a programa no la ket ta pagimbagan ken pakalung-awan dagiti umili ti Cabugao.
Dinakamat pay ni Mayor Ediboy ti pateg ti pannakaadda ti Municipal Conference Hall a naisangrat a pakaang-angayan ti adu a panagadal ken panagsursuro dagiti umili ket di masasaan nga umasidegto dagitoy a nasursuruan nga agkiddaw ti pundoda iti Gobierno Munisipal tapno maan-anay ti nasursuroda a mangpasayaat kadakuada, ti pamiliada ken iti kailianda.
“Congratulations manen! Good Luck kadakayo amin!” kinuna ti Municipal Chief Executive.
Naisaganad ti panagsarita ni Mr. Dennis Aguimbag, SLP/PDO-Cabugao, Ilocos Sur. Imbatad ti Opisial ti DSWD nga umun-una latta a mapili ti Cabugao a pakaipatungpalan iti kakastoy a seminar gapu iti madadaan a panangawat dagiti mabenepisiaran ken iti agtultuloy a pannuporta ti Gobierno Lokal nga idauluan ni Mayor Ediboy.
Naglektiur ni Mr. Dennis Aguimbag, SLP/PDO-Cabugao, Ilocos Sur.
Naaramid ti Orientation on Sustainable Livelihood Program (SLP) ken naituloy iti kamalmanna ti Roles and Functions of Community Core Group Member. Naaramid pay ti Open Forum sakbay a naserraan ti aktibidad iti dayta nga aldaw.
Dagiti barangay a nakipartisipar iti Day 2 ket dagiti sumaganad: Nagsantaan, Sagayaden, Sisim, Reppa-ac, Bato, Cacadiran, Catucdaan, Maradodon, Rizal, Arnap, Cael-layan, Marga-ay, Turod Patac, Alina-ay, Baclig, Bungro, Carusipan, Cuantacla ken Lipit. # (Web In-Action)
No comments:
Post a Comment