Monday, July 20, 2015

AGTULTULOY A MANAYONAN TI MATALON ITI WET SEASON 2015

Cabugao, Ilocos Sur – Iti pannaki-amad ti Web In-Action iti Hulio 20, 2015, imbaga dagiti kaaduan a mannalon iti panagkakarintarda ita nga agtalon ta manggapun a maparuar ti ubbog a  pagpannurayanda nangruna iti lunglungog.

Innayon ti dadduma a  matutorda iti pannakaiturong ti padanumanda ta adda dagiti makinaria nga inted ti LGU-Cabugao kasta met dagiti hose a pagsisinnublatanda nga usaren tapno mapasay-akanda  ti talonda  uray iti masakupan ti adda irigasionna ken adda bubon wenno small farm reservoir-da.

Innayonda pay  a daytoy ti napintas a parnuayen  ita ti kaadda ti makinaria, tractor, hose a kangrunaan a kasapulan iti land preparations ta maipadaras ti panagtalonda nangruna no kamkamakamenda ti adda a danum a kasapulanda.

Kabayatanna, impakaammo ni Municipal Rice Program Coordinator Mr. Nereo S. Daproza ti Cabugao  nga agtultuloy latta  iti panagbisitana kadagiti barangay ken iti disso dagiti Techno-Demo ti Hybrid ken Certified Seeds agraman iti Seed Production Area tapno maiwanwanna  met dagiti mannalon (Cooperators)  ken  kakaduana a Destino a Teknisian  ken aktual a maalada ti eksakto a bilang dagiti matalon.

Dagitoy nga aksion ken inisiatiba ket maigapu iti agtultuloy a suporta ti LGU-Cabugao iti Agrikultura iti panangidaulo ni Mayor Edgardo “Ediboy” S. Cobangbang, Jr. tapno maragpat latta ti “Food  Sufficiency Status” para kadagiti umili ti Cabugao, Ilocos Sur. # (Web Situational Report)

No comments:

Post a Comment