Cabugao, Ilocos Sur – Iti pananginterbiu ti Web In-Action kadagiti Opisiales ti Cabugao Ilocos Sur Tricycle Operators and Drivers Association, Inc., impakaammoda nga agtultuloy a makatulong ti Saranay Association-da kadagiti traysikelan iti Cabugao kas iti sumaganad a benepisio no agminatayda:
1.P5,000 ti maawat ti maseknan nga agminatay ken mairaman ti Asawa, Tatang, Nanang, anak nga awan ti asawana a mabenepisiaran uray agnaedda iti sabali a lugar/ili.
2.P20 ti mabayadan a Membership Fee ti baro nga agkameng ken P100 iti dati nga agpaspasada nga agkameng manen.
3.P10 ti bayadan ti maysa a kameng ti CISTODAI-Saranay a kas Death Aid a kolektaen ti Treasurer no matayan.
Innayonda nga addaandan iti 568 a kameng iti Saranay Association. Adda metten umabot nga P11,360 a pundo ti asosasion malaksid iti pundo ti sibubukel a CISTODAI.
Insupusopda pay a manamnama a manayonan pay ti agkameng manipud iti 881 a nakaprangkisa a traysikelan tapno mapadasanda met iti maipapaay a napintas a benepisio iti panagtitinnulong nga itden ti Saranay.
Kabayatanna, maipalpalagip latta kadagiti traysikelan dagiti dadduma a nataming a pagalagadanda iti kallabes a napagkaykaysaanda a kas iti sumaganad:
1.Pannakaipalubos laeng nga agpasada ti Traysikelan a makaala ti pammalubos “For Hire” manipud iti Land Transportation Office (LTO).
2.Update ti Pinansial a kasasaad ti Asosasion. Segun ken ni Mr. Dominador Andres, Presidente nga agdagup ti P30,000 ti naipa-loan kadagiti kameng ti bagi ti pundo; P77,000 ti nakadeposito ken P70,000 ti adda iti ikut ti Tesorero.
3.Umabot ti nasurok a sangaribu ti bilang ti Traysikelan ti ili ngem nasurok laeng a walo gasut ti agpaspasada a kompleto ti papelesna, segun ken ni Presidente Andres.
Manamnama nga iti pannakapainget ti pagannurotan a maibatay iti Municipal Tricycle Code wenno Ordinansa ket mapapardas a mapasayaat ti registration ti traysikelan ken kasta met iti serbisio nga itdenda iti sapasap, segun pay ken ni Mr. Andres. # (Web In-Action)
No comments:
Post a Comment