PRDP PROJECT, KALSADA TI UMUNA A PASAYAATENDA DITOY CABUGAO

Cabugao, Ilocos Sur – Naangay ti Public Consultation kadagiti agtagikua ti daga a masakupan iti maaramid a proyekto ti Farm-to-Market Road (Widening Project) babaen iti Philippine Rural Development Project (PRDP)-Mango Production nga ipunduan ti World Bank (WB) ditoy Cabugao, Ilocos Sur partikular  dagiti kalsada a mamagkamang ti Sitio Paddual a kumamang  iti Barangay Cael-layan ken Barangay Bato a masasao nga EEA Road iti agdama.

Naangay ti konsultasion iti Cabugao Cultural and Sports Complex, Brgy. Rizal, Cabugao, Ilocos Sur iti Hulio 16, 2015 a nagatendaran dagiti Landowners, Opisial ti PRDP-Region 1, PGIS-Engineering Office ken ti ENRMO-DENR ken Opisiales ti LGU-Cabugao nga idauluan ni Mayor Edgardo “Ediboy” S. Cobangbang, Jr.

Kimmablaaw ken nagyaman ni Mayor Ediboy ta adda dita manen ti proyekto a maited ket dinakamatna a no mano a dekada ti naglabas ket nairana a maipatungpal iti panawen ti panagtakemda ket  mapasayaat dagitoy a kalsada babaen iti Grant nga itden ti PRDP World Bank-Assisted Project.

Innayon ti Municipal Chief Executive nga umuna manen ti Cabugao kadaytoy a proyekto ket kalikagumanna a makomplementaran koma dagitoy a maited a pagsayaatan iti natallugod a kinnaawatan dagiti agtagikua ti daga wenno madalapus a sanikua ken kadagiti mangipatungpal iti proyekto yantangay agserbi a para iti pagimbagan ti sapasap iti agdama ken iti sumarsaruno a henerasion ti taga-Cabugao.

Bininsa pay ti Ama ti ili iti gapu a napataud daytoy a proyekto ket impeksana ti naan-anay a suporta ti Munisipio iti alokasion a naited iti sektor dagiti agpatpatanor ti mangga a namkuatan ti PRDP a nangaprobar iti maipatungpal a programada iti industria ti mangga ditoy nga ili.

Kinunana pay a kalpasan a maipaawat kadakuada ti kaipapanan daytoy a proyekto ken makapagsisinnukatda iti kapanunotan ket siwawayada a mapan iti opisinana a mangtaming iti dadduma pay a pakaseknanda a mangpasayud ti implementasion ti proyekto.

Nagsarita met da Mr. Romel Tejano, Environment Safeguard Specialist (ESS),  Region 1 ken ni Mr. Peter Gonzales, Social Safeguard Specialist, PRDP-Luzon A ket bininsada ti pateg ti proyekto para iti agdama ken iti masanguanan dagiti umili ti Cabugao ken kadarapatna nga il-ili ti 1st District, Ilocos Sur.

Naisaruno ti  Open Forum. Nasungbatan a naimbag dagiti timmaud a saludsod dagiti maseknan a nagpartisipar babaen ti itutulong ni Municipal Engineer Crescencio Marcos C. Formoso ken pannakabagi ti Municipal Assessor’s Office.

Nakipaset met iti nasao a Konsultasion dagiti Opisiales ti Barangay Rizal, Caella-yan ken Barangay Bato kasta metten dagiti naggapu iti Kapitolio Probinsial nga isuda Engr. Madeleine Arce, Administrative Officer V, PEO-SES, PRDP; Engr. Jerome Rocero, Engr. II, PEO; Engr. Winston Rigunay, Engr. II, PEO; Mr. Joel Veraflor, Draftsman II, PEO ken ni Mr. Nelson Abella, CDA 1, ENRMO. # (Web In-Action)