Wednesday, July 8, 2015

NAPINTAS A PAGTULADAN TI “PROJECT TREE” TI SALOMAGUE E/S!

Cabugao, Ilocos Sur – Maysa manen a pagpannakkel a proyekto  ti Salomague Elementary School ket ti pannakapili ti pagadalan iti intero a Cabugao DepED District a pakailunsadan ti proyekto a “Project Tree” iti Kapitolio Probinsial babaen iti liderato ni Governor Ryan Luis V. Singson a naisentrao iti benneg ti Education Sector. 

Napili ditoy Brgy. Salomague a pakailunsadan ti proyekto ti Kapitolio maipapan iti pannakasalbar ti aglawlaw, masursuruan dagiti agbasbasa nga agpatanor/agmula ti kayo iti espasio ti lote ti pagadalan. Nadaras a dumakkel dagitoy agduduma ti klasena a maurnong a seedlings. 

Kanaig daytoy, ti kinapuskol ti mini-forest zone ti pagadalan iti agdama  ket kangrunaan a naisagut dagiti agad-adal, mangisursuro ken asideg a pumurok ti barangay  ta malaksid a presko ti  angsen-da, mapalamiisan pay ti aglawlaw iti ikub ti pagadalan ken aglawlawna  no kapudot ti tiempo.

“Nupay nagturposen ti kaaduan  nga agad-adal a nagimula kadagitoy a  kaykayo ket maisagut latta met daytoy a nakallalagip a gapuananda  kadagiti sumarsaruno a henerasion ti agbasbasa iti pagimbagan nga itden ti Forest Zone ti pagadalan. Pagyamananmi  pay ti Teaching Staff ken nagannak a nangisungsong iti panangpaberde ti aglawlaw ti pagadalanmi,” impeksa ni Mr. Ronel M. Ubaldo, Head Teacher III ti Salomague E/S.

Innayon ni Mr. Ubaldo ti dakkel a panagyamanda ken ni Governor Ryan ta nataliawda ti pagadalanda a pakaipromotan daytoy a proyekto ket ita pay ket inaramiddan ti nursery-da a pagur-urnonganda ti pangrugianda a  patuboda a seedlings nga agduduma ti klasena nga aganayto iti 4,000 ti bilangna.

Nupay maikkanda iti insentibo ngem kuna ni Mr. Ubaldo a napatpateg ti panangpatuladda iti kaaduan iti kastoy a wagas a panangtulong a mangpaberde iti aglawlaw.

Dagitoy nga aksion ken inisiatiba ket mayataday iti naregget a programa ti reforestation  ti  Gobierno Munisipal nga idauluan ni Mayor Edgardo “Ediboy” S. Cobangbang, Jr. a mapasamak iti nasaknap a panagpatanor/panagmulmula ti kayo iti benneg ti amin a sektor iti Munisipalidad tapno agtultuloy a maitandudo ti Clean and Green Program ti Munisipio ken ti Probinsia. # (Web In-Action)

No comments:

Post a Comment