Wednesday, February 17, 2016

BLESSING TI RICE COMBINED HARVESTER THRESHER TI FREE FARMERS, NAANGAY

Cabugao Ilocos Sur – Naaramid ti pannakabendision ti Combine Rice Harvester Thresher ti  Sagayaden Free Farmers MPCI, Brgy. Sagayaden, Cabugao, Ilocos Sur idi Pebrero 16, 2016 iti Cooperative’s Ground, Brgy, Sagayaden, Cabugao, Ilocos Sur.


Immuna a parte ket iti naangay a Thanksgiving Mass ken pannakabendision ti makinaria babaen ken ni Rev. Fr. Angelito P. De Gracia.

Iti naangay a programa, nag-Welcome Address ni Mr. Benedicto Satumba, BOD Chairman ken nagmensahe ni Brgy. Captain Virgilio Piros.

Iti Mensahe ni Mayor Edgardo “Ediboy” S. Cobangbang, Jr., kimmablaaw ken nagyaman kadagiti amin a nagatendar kangrunaanna kadagiti Oipisiales ti Department of Agriculture (DA) nga idauluan ni Mr. Constatnte B. Botacion, Jr., Provincial Agriculturist kasta metten dagiti Balikbayan nga isuda Mr. Benito Piros ken ni Mrs. Fely Sayaboc-Piros, agassawa a nagidonar iti lote a nagdissuan dagiti pasilidad ti Kooperatiba.

Impeksa ni Mayor Ediboy iti kinaragsakna iti panagballigi ti Kooperatiba ken daytoy a nagun-odna a kabaruanan a makinaria. Binigbigna iti kabaelanda a tumakder  ken  agtultuloy a pannakikinnammayetda kadagiti programa ti LGU, Probinsial ken ti DA iti pannakaidur-as ti sektor- agrikultura partikular iti Counterparting kadagiti makinaria a magungun-od ti Kooperatiba.



Innayon ti Ama ti Ili a dagiti gapuananda ket pakaidaydayawan ti umili ket uray puonanda iti panagtalek, rigat ken pammati ket komkomplementaran met ti Munisipio dagitoy a pannakaprobitsar dagitoy a pagsayaatan nga ited  dagiti mayataday nga Ahensia.

Kuna ni Mayor Ediboy a nakagasgasat unay a Mayor ta isu ti pangulo dagiti kailianna a pagserbianna ken pannakapasamak kadagitoy a balligi ken magun-od a pagsayaatan ti kaaduan.

Binigbigna pay ti kaadda da Mr. ken Mrs. Benito Piros a donor ti lote ti kooperatiba. Naragsak ta awitda daytoy a damag ken nasaksianda inton agawidda idiay ballasiw-taaw ket nayonandanto manen dagiti maipaayda nga ayat.


Nagsarita met ni Provincial Agriculturist Constante B. Botacion, Jr. Impadamagna iti nagkaadu a programa/proyekto  ti Gobierno Probinsial nga idauluan ni Governor Ryan Luis V. Singson kadagiti mannalon ken iti Kooperatiba iti masanguanan ket imbagana pay a mataginayon latta iti agtultuloy  ken nasayaat a kammayet ti LGU ken ti Gobierno Probinsial tapno naballigi pay dagiti maigannuat nga aktibidad ken proyekto a pagimbagan dagiti umili a maserbianda.

Iti Closing Remarks, napalalo ti panagyaman ni  Mr. Zosimo Sayaboc, Manager ti Kooperatiba ket kunana a miembro man ken saan ket mairanud kadaytoy a makinaria a nagun-odda. Pinagyamananna ti agtultuloy a tarabay ti Munisipio iti pannakailungalong kadagiti kayatda a gun-oden a maiserbi kadagiti mawidawidan ti kooperatiba. # (Web In-Action)

No comments:

Post a Comment