Wednesday, February 24, 2016

PHILIPPINE CANCER SOCIETY MANGTED LIBRE SERBISIO MEDICAL ITI ILOCOS SUR

Libre a serbisio medical ti inted ti Philippine Cancer Society (PCS) kadagiti napapanglaw a babbai ken ubbing iti probinsia idi Pebrero 16 ken 17 sadiay Gabriela Silang General Hospital iti barangay Tamag ditoy a siudad, kuna ni Patch Savellano Singson, asawa ti agdama a gobernador, ken lider ti grupo dagiti babbai a timmulong iti gobierno probinsial a makaumay ti PCS ditoy probinsia.

Libre ti operasion para kadagiti babbai ken ubbing ta ipangpangruna ngamin ti grupo ni Singson dagiti inna, annak, ken babbai iti probinsia. Adda pay naited a konsultasion maipanggep iti panagplano ti pamilia, natalged a panagbalin nga ina ken panagpasusu, pap  smear, agas ken bitamina. 

Gutgutuguten ti gobierno probinsial nga idadaulluan ni Gobernador Ryan Luis V Singson, ken ti grupo dagiti babbai ti pannakairanud amin a babbaket, babbai ken ubbing iti duwa a distrito manipud 34 nga ili ken siudad kadaytoy nga iyuumay iti PCS. Mailagip a ti asawa ti gobernador ti maysa kadagiti napili a “Best Dressed Women” ti PCS idi napan a tawen gapu kadaytoy kastoy a proyektona.

Ti Philippine Cancer Society, Inc. ket maysa a pribado a korporasion a nairehistro iti Securities and Exchange Commission idi Disiembre 22, 1956. Napundar babaen ti grupo dagiti doktor ken dagiti saan a konektado iti mediko tapno ‘matulungan dagiti Filipino a mangsaranget iti kanser babaen iti pananglapped ti sakit, ken panangtiped ti ipapatay gapu ti kanser, kangrunaan kadagiti kakaasi ti biagna. Daytoy  ket babaen ti inpormasion, edukasion, adbokasia, ken serbisio.

Addaan ti grupo dagiti doctor medical a kanayon a mapmapan mangted kadagiti lektiur maipanggep iti inpormasion ti kanser, kanser iti babbai ken lallaki, kanser ti bara, ken pannakaisardeng ti panagsigarilio.

Ti PCS ket makitultulag kadagiti nagduduma a grupo, pagadalan, pagtrabahuan, opisina ken dadduma pay tapno mangted kadagiti lektiur ti panangkontrol ti kanser. Naipokus dagitoy iti pananglapped ti kanser, ken nasapa a pannakaduktal ti sakit. # Source -  (MCA/  Imelda C. Rivero
/PIA1 Ilocos Sur). 

No comments:

Post a Comment