Cabugao, Ilocos Sur – Napasingkedan ti Sisterhood iti nagbaetan ti County of Hawai’i, Estado ti Hawaii, USA ken iti LGU-Cabugao babaen iti ipapan ti Delegasion nga indauluan ni Mayor Josh Edward S. Cobangbang idiay ballasiw-taaw itay nabiit.
Pormal a nakipinnirma iti Katulagan ni Mayor Josh Edward ken ni County Mayor Harry Kim iti panagbalin a Sisterhood City ti ili a Cabugao kadaytoy nadakamat a siudad a masakupan iti Estado ti Hawaii iti imatang dagiti kameng ti Konseho ti Siudad nga indauluan ni Council Chairwoman Valerie Poindexter kasta metten dagiti Konsehales ti ili a Cabugao a nangbayabay ken ni Mayor Josh Edward.
Pinagyamanan unay ni Mayor Josh Edward dagiti Opisiales ti County of Hawai’i nga idauluan ni Mayor Harry Kim ken iti Estado ti Hawaii iti daytoy a nagun-od a balligi iti agsumbangir.
Impeksa ti Mayor iti pateg ti batonlagip nga imbati dagiti Sakadas a nagtrabaho iti Hawaii a nakaipuonan iti panagtipon iti puli ken kultura; pannakapabaknang ti kalidad iti biag; pannakaaramid dagiti goodwill mission ken panagsinnukat iti programa dagiti Ilokano ken Filipino.
Nabara met iti panangsarabo dagiti Opisiales ken Kameng ti nadumaduma nga Asosasion iti Ilokano ken Filipino iti Delegasion ni Mayor Josh Edward kabayatan iti panagbisitada kadagiti kakailian iti Cabugao nga agindegen iti Estado ti Hawaii.
Maibilang met iti Delegasion ni Pasado a Mayor Edgardo “Ediboy” S. Cobangbang, Jr. ti ili a Cabugao ken kameng ti Pamiliana.
Sakbayna, naaprobaran ti Resolution No. 57, Series of 2017 babaen iti Sangguniang Bayan ti ili a Cabugao, Ilocos Sur ken inaprobaran ni Mayor Josh Edward S. Cobangbang iti pormal a panagkalikagum ti Munisipalidad ti Cabugao iti pannakaestablisar ti Sisterhood ti LGU-Cabugao ken ti County of Hawai’i. # (Web In-Action)
No comments:
Post a Comment