Cabugao, Ilocos Sur – Narugianen ti pannakaitrabaho ti panag-ID dagiti mangngalap kadagiti asosasion a masakupan dagiti pito a Coastal Barangays ti ili a Cabugao, Ilocos Sur kas iti Brgy. Sabang, Daclapan, Salomague, Namruangan, Pug-os, Salapasap ken Dardarat babaen iti direktiba ti Bureau of Fisheries and Aquatic Resources (BFAR), Regional Field Office (RFO) babaen ken ni BFAR Regional Director Nestor D. Domenden, CESO V.
Daytoy a gannuat ket adda pannakainaig iti programa ti BFAR National Office tapno naan-anay a maiyintek dagiti pagsayataan a naisangrat para kadagiti mangngalap ken maammuan met ti dagup dagiti Fishermen iti tunggal disso a pagbasaran kadagiti mayataday a plano ken programa para iti pagikanan.
Iti ili a Cabugao, Ilocos Sur, idauluan ni Municipal Fisheries Coordinator Milagros R. Paz ti mapan kadagiti nasadakamat a barangay tapno imitingda nga umuna daytoy a gannuat sakbay a maipakatda tapno nadardaras ti panangiringpasda kadaytoy a trabaho a naipaannong kadakuada. # (Web In-Action)
No comments:
Post a Comment