Cabugao, Ilocos Sur – Naangay ti Committee Meeting iti Sangguniang Bayan ti Cabugao, Ilocos Sur iti Nobiembre 8, 2013 ken nagatendaran dagiti Opisiales ti Bureau of Jail Management and Penology (BJMP)-DILG Region 1 tapno mapagsasaritaan ti manamnama a pannakaipasdek ti pagbaludan a tarawidwidan ti BJMP ditoy nga ili.
Nagpaay a Presiding Officer ni SBM Benedicto M. Savellano, Committee Chair on Rules ket naistudiar a naimbag ti plano/proseso a pannakaipasdek ti pagpupokan ti balud iti lote ti Munisipio iti masakupan ti Brgy. Baclig, Cabugao, Ilocos Sur.
Nangay ti deliberasion ti Committee Meeting ket inlawlawag ti BJMP ti pakabuklan ti proyekto ken naipeksa dagiti kapanunotan iti tunggal pannakabagi ti Konseho Munisipal ken nakonsulta dagiti pannakabagi ti Municipal Assessor’s Office a mangpasingked ti kaadda ti lote a pagdissuan ti maaramid a pagbaludan.
Kalpasan iti napasamak a deliberasion, naaramid ti ocular inspection iti posible a pakaipatakderan ti Jail Facility iti panagturong ditoy dagiti kameng ti Sangguniang Bayan, BJMP, Municipal Assessor ken ti pannakabagi ti Barangay Council ti Brgy. Baclig tapno umaddang ti proseso iti pannakaipatungpal daytoy a proyekto ti BJMP.
Daytoy a gandat ket immuna a napagsasaritaan iti imatang ni Mayor Edgardo S. Cobangbang, Jr. babaen kadagiti Opisiales ti BJMP ket patalgedan ti Konseho Munisipal iti mabukel a Memorandum of Agreement (MOA) kalpasan a mairingpas dagiti kasapulan a papeles. Napagnanamingan pay iti deliberasion a maangay ti Public Hearing ti nasao a Gakat kadagiti barangay sakbay nga aprobaran ti Hepe Ehekutibo ti Ili.
Imbatad ni Atty. Paul Balag-ey ti BJMP Region 1 a manamnama a maileppas ti Jail Facility iti unos ti dua a tawen kalpasan iti maaramid a panagpinnirma iti MOA iti nagbaetan ti LGU-Cabugao ken ti BJMP-DILG Region 1.
Buklen dagiti Opisiales a nagmimiting da SBM Dr. Carlito S. Pano, SBM Vicky S. Serna, SBM Danny Q. Gazmen, SBM Jayhan Alcid Tan, SBM Josefina S. Vallejo, Municipal Assessor Lilia S. Flores, Engr. Conrado Segui, SB Secretary Maxfel S. Suboc ken ni Incoming Brgy. Captain Carlos V. Sison ti Brgy. Baclig.
Indauluan met ni Atty. Paul Balag-ey dagiti pannakabagi ti BJMP-DILG Region 1, San Fernando City, La Union. # (Web In-Action)
No comments:
Post a Comment