Cabugao, Ilocos Sur – Naangay ti Emergency Meeting dagiti Opisiales ken Miembros ti Cabugao Vegetable Growers and Producers Association idi Nobiembre 8, 2013 iti Municipal Building, Cabugao, Ilocos Sur.
Tinarawidwidan ni Kagawad Armando Azcueta, Presidente, ti nasao a miting ket indagadagna ti madagdagus koma a panangisubli (panagbayad) dagiti nakabulod ti kantidad manipud iti pundo ti asosasion tapno maurnos no mano itan ti pakabuklan ti Pundo ti asosasion babaen kadagitoy a naipasublat a gatad nga ay-aywanan dagiti Opisiales ti Asosasion.
Maibatay iti Rekord ti Tesorero ti Asosasion, adda metten iti sumagmamano a kameng a nakaisublin ti nabulodda a gatad ket babaen iti inaramidda a boluntario a panagbayad ket madagdag met dagiti kakaduada a padada a nakabulod nangruna kadagiti nangusar iti nasublatda a pinag-buy and sell ti nateng itay napalabas a panagnanateng.
Natratar pay dagiti dadduma a pakaseknan iti asosasion iti biang dagiti kameng ken iti rekord-pinansial tapno mapatibker/naurnos iti pannakaiwayat manen dagiti sumaruno a plano ken proyekto ti asosasion kadaytoy nga umay a panagnanateng iti Main Crop Season (Nobiembre 2013-Mayo 2014).
Iti pannakiuman ti Web In-Action kadagiti Opisiales ti Asosasion ket inaklonda nga adda nakaarusanda ngem agserbi daytoy a pagbasaran/pagadalanda tapno umagpangda manen a siinanama iti sumaruno a panagmumula ti nateng babaen iti agtultuloy a panagkaykaysada ken panangtarabay ti Gobierno Lokal kadakuada. # (Web In-Action)
No comments:
Post a Comment