Cabugao, Ilocos Sur – Agtultuloy a mamonitor ti Programa ti Environmental Management ken Clean and Green Program ti Munisipio.
Iti pannakiuman ti Web In-Action idi Nobiembre 6, 2013, imbatad ni MENRO Edgar S. Balangatan, AT, a nairingpasda met laengen a nadalusan dagiti pampubliko a disso a masarkan a nangruna iti Poblasion maigapu iti long weekend vacation a ginubuay dagiti Holidays ken Bagyo Vinta.
Kalpasan itoy, innayon ni Mr. Balangatan a mapan kadagiti 33 a barangay ket kitaenna met ti pagdurdur-asan ti programa ditoy nangruna iti pannakapaadda iti Barangay Nursery, Herbary, Garden, Compost Pit ken Material Recovery Facility (MRF) tapno maiyannurot met laeng iti sustenable a pannakaipakat ti programa.
Insupusop pay ni MENRO Balangatan a pakibisitada pay iti nakaimulaan ti Giant Ipil-ipil Seedlings a nagkammayetan a proyekto ti LGU-Cabugao ken ti NTA-Vigan City tapno masulnitan ti panagkirang ti kayo a mangbalanse iti klima ti aglawlaw.
Dagitoy nga aksion ken inisiatiba ket gubuay ti nadigem a pannakaipakat ti programa iti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakasaluad ti aglawlaw a pakaisagutan dagiti umili. # (Web In-Action)
No comments:
Post a Comment