Cabugao, Ilocos Sur – Naaramid ti Memorial Service a pangpadayaw iti pimmusay a Public Servant nga isu ni Dios ti aluadna a Genara Castillo-Baclig ti Brgy. Pug-os, Cabugao, Ilocos Sur idi Nobiembre 16, 2013 iti sango ti Presidencia (Munisipio) ti ili a Cabugao nga inimatangan ti Pamilia-LGU ken iti sapasap nga umili ken dadduma pay nga Opisiales ti nadumaduma a sektor iti kagimongan.
Iti naangay a programa, nag-Eulogies da Kagawad Floro S. Baclig ti Brgy. Pug-os ken ni Mrs. Lucila S. Somera ti LGU-Cabugao.
Imbagian met da Brgy. Captain Arnold V. Yangat ken SBM Danny Q. Gazmen ti ABC ken ti Sangguniang Bayan kas panagsaganadda a nangibasa iti Resolusion No. 05, Series 2013 a pannakipagrikna iti naulila a pamilia ti pimmusay a Konsehala.
Nangipaay ti Message of Sympathy ni Mayor Edgardo S. Cobangbang, Jr. Binigbigna ti 29 a tawen a panagserserbi ni Konsehala Naring ket imbilang ti Ama ti Ili a maysa daytoy a pagulidanan dagiti padada nga agserserbi iti agdama. Innayon pay ni Mayor Ediboy a kapatgan pay a maibati a lagip ni Konsehala Naring ket iti panangibiag dagiti agdama ita nga agserserbi iti umili dagiti galad ken talugading ni Konsehala Naring a pangtaginayon ti napintas a nagapuanan ti pimmusay a Konsehala.
Kalpasan ti Draping of the Philippine Flag ken ti Flower Offering and Final Viewing, impeksa met ti pannakabagi ti Pamilia ti pimmusay iti nalaus a panagyamanda iti sapasap iti naited a memorial service ken pannakapadayaw ni Konsehala Naring sakbay a naiturong iti pagtungpalanna. # (Web In-Action)
No comments:
Post a Comment