Cabugao, Ilocos Sur – Iti pannaki-amad ti Web In-Action idi Nobiembre 11, 2013, imbatad ni Brgy. Captain Nida S. Braceros a rugiandan ti agiwayat iti proyekto iti barangay-da pakaseknan iti drainage facilities ken iti kanaigna a pagsayaatan dagiti kabarangayanda iti Brgy. Quezon.
Iti Environmental Management Program, nagiwarasda ti sag-10 a seedlings kadagiti kalugaranda a parte ti panangtulongda iti Reforestation Program ti Barangay ken ti Munisipio. Addaanda iti agdama ti Tree Park, Nursery, Herbary iti Lote ti Barangay iti asideg ti Karayan Cabugao ken ti Material Recovery Facility (MRF) iti likud ti pasdek ti Bulwagan ng Brgy. Quezon.
Innayon ni Kapitan Nida a kumitkitada iti napintas a disso a pagmulaanda ti nateng tapno makompletoda ti “Gulayan sa Barangay” a programa ti Barangay ken ti Munisipio.
Dagitoy nga aksion ken inisiatiba ket resulta ti agtultuloy a panagtutunosda a bumarangay a manggun-od iti panag-progreso ti Barangay Quezon. # (Web In-Action)
No comments:
Post a Comment