JS PROM 2014 TI CABUGAO INSTITUTE, NABALLIGI

Cabugao, Ilocos Sur – Naangay ti Juniors’ - Seniors Prom 2014 iti Cabugao Institute, Cabugao, Ilocos Sur idi rabii ti Pebrero 21, 2014 iti Cabugao Institute Auditorium.

Buklen dagiti nagpartisipar iti uppat a Class Sections ti Juniors ken uppat met a Class Sections ti Seniors.

Kalpasan ti Promenade March, Invocation, National Anthem ken CI March, nag-Welcome Address ni Ms. Leanne Khaira Ubungen. Naaramid ti Candlelight Ceremony, Grand March ken Rigodon Royale ken panagsasala dagiti agkakapareha nga estudiante.

Impaay ni Miss Katrina Joy Ramos ti Bequeathing of the Key of Responsibility ken Acceptance of the Key of Responsibility ni Miss Odette Balazan. Kalpasan ti Intermission Number, naaramid ti “Search for Mr. and Miss JS Prom 2014”.

Nangted ti Inspirational Talk ni Ret. Judge Efren S. Ubungen, CI Director. Inallukoyna nga agbalinda  a natakneng iti kapatadanda nga estudiante. Simmaganad ti pannaka-Award ti Mr. & Miss JS Prom 2014 nga isuda Miss Mercury Soller ken ni Mr. Samuel Nick Ibarra.

Naikkan ti Award ti 2014 CI Best Dressed of the Night a ni Miss Rhea Jane Ancheta. Nagun-od met ni Miss Leanne Khaira Ubungen ti Miss Kojie San Dream Girl.

Nag-Closing Remarks ni Miss Maria S. Rondon, Principal. Nagyaman ti Principal iti napintas ken naballigi a partisipasion dagiti estudiante. Nagpaay a Masters of Ceremonies da Mr. Gino Serrano ken ni Miss Leanne Khaira Ubungen. # (Web In-Action)

2ND BATCH TI TRAINING TI BRGY. OFFICIALS, NARUGIAN

Cabugao, Ilocos Sur – Naangay ti 2nd Batch ti Training-Seminar dagiti Barangay Officials (Punong Barangay, Brgy. Kagawad, Brgy. Secretary, ken Brgy. Treasurer) kadagiti 11 a Barangays ti ili a Cabugao, Ilocos Sur a kas iti Brgy. Pug-os, Cael-layan, Reppa-ac, Aragan, Arnap, Catucdaan, Sisim, Turod Patac, Alina-ay, Cacadiran ken Sagayaden.

Nangrugi ti panagsanay idi Pebrero 26, 2014 ken agpatingga inton Pebrero 28, 2014.

Iti Day 1 ti Training, naisuro ti pakabuklan ti Barangay Structure, Duties and Responsibilities of Barangay Officials, Benefits of Barangay Officials ken dadduma pay  a kanaigna a mayadal kadakuada kas sagudayen ti Local Government Code. Kangrunaan a naglektiur ni Mrs. Constancia “Connie” L. Quinola, Local Government Operations Officer (LGOO) V ti MLGOO-DILG, Cabugao, Ilocos Sur.

Manamnama a maileppas dagiti agsanay nga Opisiales ti barangay kadagiti naisagana nga adalenda/modules  iti unos ti tallo nga aldaw kas naan-anay a kalasagda iti panagipatungpalda kadagiti naipakumit a pagrebbenganda kadagiti kabarangayanda.

Maud-udi nga agseminar ti maikatlo a batch a buklen met laeng ti 11 a barangays santo makompleto ti amin iti 33 a barangay ti Cabugao, Ilocos Sur a maikkan ti adal maipapan iti pannakaipakat ti  Barangay Administration. # (Web In-Action) 

DINTO AGKUPAS TI LAGIPMI KENKA, KAPITAN EDDIE

Cabugao, Ilocos Sur - Mataginayonto ti lagip ken namaris a pakasaritaan ti panagbiag ken panagserbisiona kadagiti kalugaranna ken kakailianna ni Brgy. Captain Edgardo Savellano Cobangbang, Sr. iti Barangay Sabang, Cabugao, Ilocos Sur. 

Dayta ti naipangruna nga anag ti panagsarita dagiti nangipaay kenkuana ti “Eulogy” idi maangay ti Memorial Service a pammadayaw kenkuana ti LGU Cabugao iti panagserbina a  Punong Barangay ti Barangay Sabang, Cabugao, Ilocos Sur iti uppat a tawen (2010-2014).

Malagip nga idi Pebrero 18, 2014, ni Kapitan Eddie ket nagsublin iti sidong ti  Namarsua. Imparikna ti sibubukel nga umili ti Cabugao ken dagiti  am-ammo, gagayyem ken kakabagianna manipud iti kabangibang nga ili ken dadduma a  lugar   iti nalaus a  pannakipagriknada/pannakipagladingitda  ket nagtultuloy
ti ipapanda uray dagiti kameng ti sektor ti kagimongan iti pagtaengan da Kapitan Eddie idiay Barangay Sabang, Cabugao, Ilocos Sur a nagyananna.  

Iti Pebrero 27, 2014, dupudop dagiti umili ken amin a sektor ti kagimongan ti nakipagtulod ken ni Kapitan Eddie iti Cabugao Catholic Church para iti Funeral Mass nga inannong ni Archbishop Emeritus Ernesto A. Salgado, D.D.   sa naisaruno ti naaramid a Memorial Service para kenkuana iti sango ti Municipal Hall (Presidencia), Cabugao, Ilocos Sur.

Naitampok iti naidaton a programa ti pannakaibinsa ti linaon ti Resolution No. 02, Series of 2014 ti Liga ng Mga Barangay, Cabugao, Ilocos Sur nga imbasa ni Brgy. Captain Arnold V. Yangat, Liga ng mga Barangay  Secretary  ti linaon daytoy a dokumento iti  pannakipagrikna ken pannakipagladingitda  iti sibubukel a Liga ng mga Barangay ti Cabugao nga idauluan ni Brgy. Captain Thaddeus U. Soller  para ken ni Kapitan Eddie ken dagiti inulilana ken  agraman  iti pannakabigbig dagiti naruay ken napipintas a gapuananna a maysa nga umili ti Cabugao ken iti panagserbisiona iti barangayna iti uppat a tawen.

Lima a Kapitanes ti nagsasaruno a  nangipeksa iti napnuan kaipapanan a Eulogy-da ken ni Kapitan Eddie ken nangipaay met ti pangliwliwa a balikas ni Vice Mayor Deogracias Jose “DJ” H. Savellano. Imbasa met  ni SBM Danny Q. Gazmen ti Resolution No. 09, Series of 2014 a naglaon iti pannakipagrikna ken pannakipagladingit ti sibubukel a Sangguniang Bayan ti ili a Cabugao, Ilocos Sur.

Dagitoy a Resolusion ket inyawat ti sibubukel a Liga ng mga Barangay nga idauluan ni Brgy. Captain Thaddeus U. Soller kasta met iti sibubukel a Sangguniang Bayan nga idauluan ni Vice Mayor DJ Savellano  ken ni Mrs. Herminia  Salamanca-Cobangbang, asawa ni Kapitan Eddie iti imatang ti amin a naitaripnong kadayta a gundaway.

Naited ti respeto ken ni Kapitan Eddie babaen iti pannakaisagut ti sabsabong nga immuna nga inaramid ti sibubukel a Pamilia ni Mayor Edgardo “Ediboy” S. Cobangbang, Jr. ken ti Pamilia ni Kapitan Eddie, simmaruno dagiti dadaulo ti nadumaduma nga Opisina/Departamento ti LGU-Cabugao, pannakabagi ti dadduma nga Ahensia/Opisina, 33 a Kapitanes ti ili a  Cabugao ken ti Pamilia-LGU.

Iti balikas nga imburay  ni Mayor Ediboy, impeksana ti nalaus a panagyamanna kadagiti amin a nangibingay ti panawenda ken   nakipagrikna iti napasamak ni Kapitan Eddie a Tatangna. Dinakamat ti Ama ti Ili ket ti panagbalin ti Amana a paset ti biag dagiti kailianda a natulonganda ken naserbianda  partikular dagiti lumugar ti Barangay Sabang  nga umanay a balonen  ni Kapitan Eddie a kas napateg a makupikopan a tanda ti  panglaglagipan ti amin kenkuana.

Nupay napanen iti nagkaysa a biag ket dinto maumag a malaglagip ti kaaduan iti kinamanagayat ni Kapitan Eddie, kinaragsakna,  kinapasigna, kinapakumbabana, ken  kinaresponsablena nga Ama ti Pamilia ken Lider ti Barangay.
Nayanak ni Brgy. Captain Edgardo Savellano Cobangbang, Sr. idi Disiembre 15, 1947 iti Brgy. Rizal, Cabugao, Ilocos Sur kadagiti agassawa nga  Mr. Angel Balangatan Cobangbang ken ni Ms. Nieves Azcueta Savellano, agpada a mangisursuro.

Ni Kapitan  Eddie, nasinged nga awagna,  ket maikadua iti walo nga agkakabsat: Angelito, Jeana, Emsie, Lorna, Johnny, Ninfa ken Eva.

Nagadal ni Kapitan  Eddie manipud Grade 1 to IV iti Cabugao North Central School; ken Grade V to VI iti Cabugao South Central School. Nagturpos ti High School iti Cabugao Institute idi 1963 ken nagturpos iti BS Banking and Finance iti University of the East, Recto.

Nagtrabaho iti Cabugao Ice Plant idi 1969-1970;  Fortune Tobacco Corporation, 1970-1985, a  Warehouse Manager ken Salesman; Dunhill Tobacco Corporation, Riyadh, Saudi Arabia, 1985-1987, Salesman;  Maxim Integrated Technology, Sunnyvale, California, 1988-1999, a Manager.

Nagsubli iti Pilipinas ket nagtrabaho iti Maxim Cavite manipud 1999-2003. Nagretiro iti trabahona idi 2003. Nagindegda ken ti Pamiliana  idiay Brgy. Sabang, Cabugao, Ilocos Sur idi 2004  a Farmer ken agtagikua iti EC Farm Piggery. Nabutosan ni Kapitan Eddie a Punong Barangay ti Barangay Sabang  idi Tawen 2010 ken nagserbi a pangulo iti nasao a Barangay agingga iti agdama.

Ni Kapitan Eddie ket inasawana ni Ms. Herminia Belen Salamanca. Naaddaanda ti tallo nga annak: ni agdama a Cabugao Mayor Edgardo “Ediboy” S. Cobangbang, Jr. a nayasawa ken ni Ms. Jerlie A.  Seguban ket naparaburanda ti 5 nga annak: Endrei Justin, Josh Edward, Jan Maxine, Edgardo Ethan ken Jon Drigo.

Maikadua nga anakda ni Ms. Karen S. Cobangbang nga asawa ni Mr. Hiram Soberano ken addaanda iti tallo nga annak: Hermini Katheryn; Mary Gladee ken Epi Daniel.

Maikatlo nga anakda ni Ms.  Kathleen S. Cobangbang ken asawa ni Mr. Charlie Castro ken anakda ni Charles Jicko.

Ni Kapitan Eddie ket nabutosan a Vice President iti Liga ng mga Barangay, Municipality of Cabugao, Ilocos Sur manipud idi Tawen 2010 agingga iti agdama. # (Web In-Action)

ANIMAL WELFARE, ITANDUDO TI KAPITOLIO KEN LGUs

Cabugao, Ilocos Sur – Nasayud ti panagtimpuyog ita ti Gobierno Probinsial nga idauluan ni Gov. Ryan Luis V. Singson ken dagiti kapartner-na nga LGUs ti Ilocos Sur  pakaseknan iti pannakaasikaso dagiti dinguen ken animales iti Animal Care and Livestock Program.

Idi Pebrero 27, 2014, naawis ni Dr. Melvyn G. Castro, DVM, Municipal Livestock Inspector ken ni Ms. Leah Naval, Municipal Meat Inspector iti LGU Cabugao iti maysa a panagsanay nga iwayat ti DA-RFO , Bureau of Animal Industry (BAI), Animal Welfare Division ken iti Provincial Veterinary Office babaen iti panangipakaammo  ni Dr. Warren Joey  Bragado, DVM, Provincial Veterinarian babaen iti Paulo ti Information Seminar: “Improved Animal Welfare Program in the Transport of  Farm Animals for Slaughter” a maaramid idiay Candon Hotel, Calaoa-an, Candon City iti Pebrero 27-28, 2014.  Ditoy  pay a matratar ti kasasaad dagiti animales kangrunaan iti Cattle Category iti pannakaibiaheda manipud iti Farms a maipan kadagiti Slaughterhouses. Manamnama iti adu a masursuroda iti panangpasayaatda  iti  Livestock Sector iti  panagatendar dagiti dua a pannakabagi ti LGU Cabugao tapno maammuanda met dagiti kabaruanan a wagas iti epektibo a pannakatratar dagiti animales sakbay a maipanda iti pagpartian.

Iti agdama, nayeskediul manen ti Municpal-wide Deworming and  Branding,  Rabies Vaccination (Household Pets) ti animales ken dinguen  iti intero a  Munisipalidad ti Cabugao a mangrugi iti bulan ti Marso 2014 nga ipatungpal ti Municipal Livestock Office nga idauluan ni Dr.  Melvyn G. Castro ti DA-LGU-Cabugao.

Dagiti bilang a nabakunaan itay Tawen 2013 ket dagiti sumaganad: Nuang-133; Baka-74; Aso-223, Poultry-104 ken Baboy-45; iti met napurga ket 71 ti nuang; 52 ti baka; 111 ti aso; 104 ti poultry; 45 ti baboy ken 71 ti kalding.

Dagitoy nga aksion ken inisiatiba ket gubuay ti napintas a pannakibinnulig ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagiti maseknan a Partner-Agencies tapno agtultuloy a dumur-as ti kasasaad ti Livestock Sector iti ili a Cabugao. # (Web In-Action)

NAGKONSEHAL FILEMON, AMA KEN LIDER

Cabugao, Ilocos Sur – Naipaayan ti Memorial Service ni Nag-Konsehal Filemon Arcebal Sison, nag-Kapitan ti Brgy. Rizal, Cabugao, Ilocos Sur manipud 1968 agingga iti 1971 ken Nag-Konsehal ti ili a Cabugao, Ilocos Sur manipud 1972 agingga iti 1982. Kalpasan ti Funeral Mass iti Cabugao Catholic Church, naangay ti Memorial Service a pammadayaw kenkuana ti LGU Cabugao iti sango ti  Municipal Hall (Presidencia) idi Pebrero 26, 2014 nga inimatangan dagiti kakabagian, am-ammo  ti Ama ken Lider, gagayyem, Opisiales ti LGU-Cabugao kasta met ti Pamilia LGU.

Kangrunaan a nadakamat iti naipaay kenkuana nga “Eulogies” ket dagiti nasayaat a kababalin ken galadna a lider ken umili a naipakitana kadagiti kailianna kabayatan iti panagserbisiona iti Barangay ken ti Ili. 

Nayanak ni Konsehal Filemon idi Nobiembre  29, 1943 kadagiti agassawa nga Eriberto Pacifico Serrano Sison ken ni Juanita Savella Arcebal. Inasawana ni Josefina Sol Sosa, nagisuro iti Cabugao Institute ken Retirado nga Opisial ti LGU Cabugao.

Napaburanda ti innem nga annak nga isuda:  Mimie – BS Medical Technology Graduate ken agtartarabaho iti LGU Cabugao; Judith – BS Commerce Graduate, asawa ni Senior Police Inspector Reynaldo Garcia ken addaanda iti uppat nga annak: Reinier Jen, Joanna Christma, Josephine Trisha ken Reigina; Charity – BS Commerce Graduate, agtartarabaho iti LGU-Cabugao, asawana ni Mr. Andres Abara, Jr., ken addaanda iti  tallo nga annak: Marc Andrei, Andreius Jan ken ni Andreina Celine Mari; Pingle – BS Elementary Education Graduate, agtartarabaho iti Las Palmas de Gran Canaria, Spain; Mia – BS Civil Engineering Graduate ken agtartarabaho iti LGU Cabugao; Monina – BS Nursing Graduate ken maysa a Negosiante.

Nagserbi ni Konsehal Filemon a Kapitan ti Barangay Rizal manipud 1968 agingga iti 1971; Municipal Councilor manipud 1972 agingga iti 1980. Nadutokan nga Agricultural Sector Representative to the Municipal Council idi 1981 agingga iti 1982.

Kas maysa nga agpampanday ti Linteg, aktibo a nakipartisipar iti pannakaipasa ken pannakaaprobar dagiti sumaganad a linteg ti ili:

1.Anti-Littering Ordinance of 1977.

2.An Ordinance Promulgating the Traffic Rules and Regulations Governing Tricycles Commuting within Cabugao.

3.An Ordinance Regulating the Use, Control and Management of Irrigation Systems in Cabugao, Ilocos Sur.

4.An Ordinance Compelling All Wholesale Fish Merchants Transporting Fish Direct to Other Towns to Pay Fees and Imposing Penalty for Violators thereof.

Naited met ti Pammadayaw ken pangliwliwa kadagiti inulila  ni Nag-Konsehal Filemon A. Sison babaen iti dua a nagsaruno a naibasa a Resolusion manipud iti Liga ng mga Barangay-Cabugao nga idauluan ni Brgy. Captain Thaddeus “Teddy” U. Soller kasta met ti LGU-Cabugao ken ti Sangguniang Bayan   ti ili a Cabugao, Ilocos Sur  nga idauluan da Mayor Edgardo “Ediboy” S. Cobangbang, Jr. ken ni Vice Mayor Deogracias Jose Victorino “DJ”  H. Savellano kas panagsaganadda iti pannakipagriknada    iti panagturongen ni Nag-Konsehal Filemon iti nagkaysa a biag. # (Web In-Action)

MATARAKEN A KALDING, NAITED KADAGITI PWDs

Cabugao, Ilocos Sur – Nai-turnover ti 55 a Kalding kadagiti 55 a Benepisiario iti Proyekto a “Goat Production and Management”  ti  Federation of Persons with Disability-Cabugao nga idauluan ni Mr. Dante Ullero, Federation President ket naangay iti panangallawatda kadagitoy a mataraken a dinguen iti arubayan ti Cabugao Dayo, Brgy. Baclig, Cabugao, Ilocos Sur idi Pebrero 25, 2014.

Tinarawidwidan ni MSWD Officer Mrs. Lydia S. Gazmen iti pannakaited dagiti nasao a kalding a kaduana ni Mrs. Jenelyn Castillo, JO iti MSWDO.

Inimatangan met ni Vice Mayor Deogracias Jose “DJ” H. Savellano a nangibagi ken ni Mayor Edgardo “Ediboy” S. Cobangbang, Jr. iti pannakaiyallawat dagitoy a mataraken a kalding kadagiti Recipients ti PWDs-Cabugao.

Ti nasao a proyekto ket nagbuligan nga impaay ti Department of Labor and Employment (DOLE)-Vigan City babaen iti panangirepresentar ni Mrs. Charity A. Ubilas, DOLE-ISFO ken ti LGU-Cabugao nga idauluan ni Mayor Edgardo “Ediboy” S. Cobangbang, Jr.

Iti pannakiuman ti Web In-Action iti dayta a petsa, impeksa ni Mr. Dante Ullero agraman dagiti kakaduana a Recipients iti nalaus a panagyamanda iti LGU-Cabugao nga idauluan ni Mayor Ediboy kasta met kadagiti Opisiales ti DOLE-Vigan City  ta agtultuloy a maikkanda iti pateg ken tulong tapno maan-anay iti panangpasayaatda iti kasasaadda a PWDs.

RENOVATION TI SPORTS COMPLEX, NAILEPPAS

Cabugao, Ilocos Sur – Nairingpas ti pannakatarimaan ken pannakapapintas ti Cabugao Cultural and Sports Complex, Brgy. Rizal, Cabugao, Ilocos Sur ket nausar daytoy a pasilidad iti pannakaangay ti Gala and Coronation Night ti 7th Cabugao Global Grand Reunion a naaramid idi Pebrero 19, 2014.

Malaksid kadagiti pang-kultural ken pang-sports nga aktibidades a maang-angay iti nasao a Complex ket sapasap pay a maus-usar  kadagiti miting ti mannalon, programa ken aktibidades ti nadumaduma a sektor, symposium ken  programa ti Cabugao DepEd District ken dadduma pay a panagtataripnong a mainaig iti panangpasayaat ti LGU Cabugao iti benneg ti   sosial a panagbiag dagiti umili.

Ti Renovation and Improvement ti Cabugao Cultural and Sports Complex ket inlungalong ti Gobierno Munisipal nga idauluan ni Mayor Edgardo  “Ediboy” S. Cobangbang, Jr. # (Web In-Action)

OVERLAY ASPHALT TI PARTE TI SOLLER ST., NAILEPPAS

Cabugao, Ilocos Sur – Naileppas ti pannakaaspalto ti paset ti Kalye Soller manipud iti  A. Mabini St., agingga iti National Highway   a mabatogan ti Brgy. Rizal, Cabugao, Ilocos Sur babaen iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Iti pannakiuman ti Web In-Action kadagiti agdaldaliasat kadaytoy a Kalye ti Poblasion ket impeksada ti nalaus a panagyamanda iti LGU Cabugao iti  pannakatarimaan daytoy a kalsada a kangrunan a pagserkan ken rummuaran dagiti tao ken nadumaduma ti klasena a behikulo iti Poblasion. # (Web In-Action)

BAGSAKAN TI NATENG, AGTULTULOY A MAUSAR

Cabugao, Ilocos Sur – Agtultuloy a maus-usar ti inted ti LGU-Cabugao nga espasio para iti “Bagsakan ti Nateng” iti igid ti Kalsada Nasional iti asideg ti NISTC Public Market, Cabugao, Ilocos Sur.

Iti panagrekurida ti Web In-Action idi Pebrero 24, 2014, kinuna dagiti agipalpalugan ti nateng a kapigsa ita a bulan ti Pebrero  iti panagipatulodda iti nateng a maangkat ken mailako idiay Urdaneta, Pangasinan, Balintawak, Quezon City ken Divisoria, Quiapo, Manila.

Innayon dagiti agipalpalugan a nangrugida a nagoperar idi Nobiembre 2013 ken agpatingga inton  Mayo 2014 iti mapatta-patta a panagbassit ti mailakoda a nateng.

Ita a bulan ti Pebrero 2014, insupusopda a kangina ita ti nateng kangrunaan iti Django Pepper ken ti   Bell Pepper ta nanginngina ti panaggatang dagiti mailako kadagiti Merkado ngem kadagiti Trakan nga umay aggatang nga ilakoda met  iti Paktoria nga agkasapulan ti materialesda a kadagitoy a  nadakamat a nateng.

Impeksa dagiti Komersiante/Agnatnateng iti panagyamanda iti LGU-Cabugao nga idauluan ni Mayor Edgardo “Ediboy” S. Cobangbang, Jr. kasta met iti Cabugao Vegetable Growers and Producers Association ta naikkanda iti pagsilawanda iti Bagsakan iti rabii a panagipaluganda ken mangnamnamada pay iti dadduma a maited kadakuada a tulong  iti Bagsakan kadagiti masungad nga aldaw. # (Web In-Action)

16 TI TEST PASSERS ITI ALS DITOY CABUGAO

Cabugao, Ilocos Sur – Naiparuar ti nakapasa iti Eksamen a nagpartisiparan ti 52 nga ALS Learners ti Cabugao, Ilocos Sur iti  Alternative Learning System (ALS)-DepED Cabugao District a programa ti Department of Education (DepED) kadagiti Out-Of-School Youth (OSY)/Dropouts iti agdama.

Segun ken ni Mr. Warren Sumibcay, ALS Mobile Teacher ti Cabugao South Central School ket umabot iti 52 a Learners ti ALS Batch 2013  ti nageksamen idi Oktubre 21, 2013 idiay Narvacan National Central High School, Narvacan, Ilocos Sur ket dagiti sumaganad ti napagasatan a nakaruar ken umawat ti Diplomana  iti Elementaria ken iti High School: Donna B. Basuil; Heidee D. Blas; Marvie L. Castillo; Ritchell R. Corpuz; Melecio Samuel Discion; Haydee S. Fiesta; Freddie S. Ingo; Jeric Jara; Charles John S. Jara; Donacel S. Manuel; Jester G. Mercado; Nanette S. Rabor; Joejee S. Saplor; Jeryl C. Solmerin  ken ni  Sheldon D. Sumagit.

Kakaisuna a ni Cesar S. Jacob ti Brgy. Quezon, Cabugao, Ilocos Sur iti nakaigasat iti benneg ti Elementaria.

Innayon ni Mr. Sumibcay nga maibasar iti rekord ti DepED,  umabot iti 200,000 ti dagup ti ALS Learners a nageksamen  iti Batch 2013 iti intero a Pilipinas ket 72,000 laeng ti pimmasa a pakairamanan ti 16 a Taga-Cabugao, Ilocos Sur. # (Web In-Action)

MITING DAGITI AGTAGIKUA TI FISHING VESSELS, NAARAMID

Cabugao, Ilocos Sur – Naangay ti First Meeting dagiti Agtagikua/Operators ti Commercial Fishing Vessels idi Pebrero 21, 2014 iti Municipal Fisheries and Aquatic Resource and Management Council (MFARMC) Office, Municipal Hall, Cabugao, Ilocos Sur.

Tinarawidwidan ni Mrs. Milagros R. Paz, Fish Examiner ti nadakamat a miting. Pinagtutulaganda iti panagatendarda iti mangay nga 4 nga aldaw  a  seminar/panagsanay inton Pebrero 25-28, 2014 ken panagrehistro pay  babaen iti Regional Inter-Agency Composite Team nga idauluan ti BFAR a maideploy iti ili ti Magsingal, Ilocos Sur.

Segun ken ni Mrs. Paz ket maysa daytoy nga oportunidad kadagiti agtagikua ken operator ti pagkalap ta manam-ayan ken malakaanda iti gastosen iti panagparehistro ken panagalada  iti lisensia iti pagkalapda.

Dagiti nagatendar a Fishing Vessels Owners/Operators ket isuda Ferdinand Sesuca; Francisco Sejalvo, Jefferson de la Cruz ken Wilfredo S. Savella. # (Web In-Action)

MOTORCADE TI ROYAL COURT TI GLOBAL REUNION, NADAEG

Cabugao, Ilocos Sur - Naaramid ti Motorcade iti bigat ti Pebrero 20, 2014 a nagpartisiparan dagiti kameng ti Royal Court nga indauluan ni Her Majesty Queen Perpetua 1st ket nailuganda iti nangayed a Karuahe iti pannakaiparadada iti aglikmut ti Poblasion a binuya ti adu nga umili a sisesegga a nagpadaan iti agsumbangir a paset dagiti kalsada a nagdalanan ti Motorcade.

Nakipartisipar pay iti nasao a Motorcade dagiti kameng ti Kapolisan ti ili a Cabugao,  Cabugao Riders Club; nagparada dagiti nagduduma ti klasena a service vehicles a nagluganan dagiti Sangaili/Balikbayans ken Taga-Media, LGU Vehicles a nagluganan dagiti pannakabagi ti Munisipio ken dadduma nga asosasion, ken “Old Military Jeeps”  a nagluganan dagiti dadduma a kimmuyog iti nasao a Motorcade. 

Nangrugi ti Motorcade manipud iti sango ti Munisipio sa  nagturong ken nagrikus  iti NISTC Public Market ken nagsubli a nangunor ti National Highway ken sinurotna ti Processional Routes iti Brgy. Bonifacio, Brgy. Quezon, ken Brgy. Rizal sa nagsardeng ti apagapaman  iti sango ti Cabugao Cultural and Sports Complex.

Kalpasan ti sumagmamano a minutos, ti ekker ti Motorcade ket nagturong a nagtungpal idiay Compound ti Monte Costa Beach Resort, Brgy. Salomague, Cabugao, Ilocos Sur a nakaangayan ti Picnic ken pagdadanggayan dagiti Balikbayans ken nangtarabay kadakuada nga Opisiales ti Barangay, LGU Cabugao kakabagian ken gagayyem dagiti Balikbayans, ken Taga-Media. 

Naaramid ti panagsasarita kadagiti dadduma pay a pakaseknan ken plano dagiti opisiales ken miembros dagiti asosasion kabayatan ti naaramid a Picnic ken panagrelaks.
Iti pannakiuman ti Web In-Action iti dayta a petsa ken gundaway, dagiti sumaganad a kapanunotan ti  naibagada iti maipapan iti padasda ditoy Cabugao:

“Pinaka-bongga a Global Reunion! Cabugao has been in abrupt changes in all aspect!” imbatad da Ms. Adrelina Sonico, ken ni Ms. Espie Sumibcay, Opisiales  ti Cabugao Sons and Daughters  Association of Hawaii (CSDAH).

“Perfect peace and order and it is  really secure and safe!” kinuna met  ni Ms. Gillie Imperial Sonico, Opisial ti CSDAH.
“Very excellent!” kuna met  da Mr. Felix Sana, Ms. Francisca Arce ken ni Ms. Natividad Sana, agpapada a taga-Brgy. Quezon ken pannakabagi ti Cabugao Association of Northern California (CANCA).

“In order, happy, and beautiful!” impeksa ni Ms. Regina P. Jara, taga-Brgy. Cuantacla ngem agnaeden iti Rome, Italy.
“Impressive, coordinated, more improvements, hospitable and accommodating leaders!” kinuna met ni Mr. Louie “Nonoy” Pe Benito a taga-Brgy. Rizal ken  nangirepresentar iti Cabugao Organization of Southern California (COSCA). # (Web In-Action)

BLESSING TI PROYEKTO DAGITI BALIKBAYANS

Cabugao, Ilocos Sur – Naangay ti Cutting of Ribbon, unveiling of marker ken pannakabendision ti naileppas  a baro a pasdek ti Municipal Electronic Library nga inimatangan dagiti Balikbayans, Sangaili, Opisiales ti ili ken Barangay ken nagatendar nga umili ti Cabugao, Ilocos Sur idi agsapa ti Pebrero 20, 2014 a maudi nga aldaw ti 7th Cabugao Global Grand Reunion ditoy ili a Cabugao, Ilocos Sur.

 

CLICK HERE TO VIEW MORE PHOTOS

Ni Mayor Edgardo “Ediboy” S. Cobangbang, Jr. agraman iti Royal Court nga idauluan ni Ms. Perpetua Solanzo Kojo, Her Majesty Queen 1st, 7th Cabugao Global Grand Reunion 2014 iti nanggetteng iti laso a mangipakita a naileppasen ti nasao a baro a pasilidad ti Munisipio.

Indauluan pay ni Mayor Ediboy  a binayabay dagiti kameng ti Sangguniang Bayan ken agraman dagiti Balikbayans, Pamilia-LGU, naitaripnong nga umili iti pannakaiwaknit ti Marker ti nasao a proyekto a nakaibanagan ti nakaigapuan iti panagpakandidata ti 7th Cabugao Global Grand Reunion 2014 a nangkulminar iti nasao a panagtitipon.

Kalpasan ti pammendision ni Rev. Fr. Felix Costales, Parish Priest, St. Mark the Evangelist Catholic Church, naaramid ti grupo-piktorial iti Royal Court, ni Mayor Ediboy ken dagiti kameng ti Sangguniang Bayan ken pangulo ti nadumaduma a Departamento ti LGU-Cabugao agraman dagiti empleado a naitaripnong.

Ti Electronic Library ket maisagut kadagiti umili ken nangruna dagiti agad-adal iti Elementaria, High School ken Kolehio ket naaramid daytoy a proyekto babaen iti panangilungalong  ti  7th Cabugao Global Grand Reunion nga indauluan ni Mayor Edgardo “Ediboy” S. Cobangbang, Jr., Honorary Chairman. # (Web In-Action)

CLICK HERE TO VIEW MORE PHOTOS

CORONATION NIGHT TI GLOBAL REUNION, NADAEG KEN NARAMBAK

Cabugao, Ilocos Sur – Naaramid ti Gala & Coronation Night iti karabiyan ti maikatlo nga aldaw (Pebrero 19, 2014) iti 7TH Global Grand Reunion a maang-angay iti Cabugao, Ilocos Sur nangrugi idi Pebrero 18-20, 2014.

Napasamak  ti Coronation Rites iti napabaro (Renovated and Improved) a Cabugao Cultural and Sports Complex, Brgy. Rizal, Cabugao, Ilocos Sur iti karabiyan ti Pebrero 19, 2014.
Nasapa a dimteng dagiti nakaaruat iti Pormal a  Balikbayans, Opisiales ti LGU-Cabugao ken iti Gobierno Probinsial; ken  kameng ti Usher and Usherettes.

Naurnos met ti panagiwardas dagiti agay-aywan ti linak ken talna: Kapolisan, BFP ken dagiti Barangay Tanod a nangurnos ti trapiko iti sango ti Complex, sango ti Munisipio ken iti kanto iti National Highway. Naregget dagiti nadesignaran a kameng ti Pamilia LGU-Cabugao  a nagasikaso iti Registration Tables ken kangrunaan iti nabara a panangsabatda kadagiti agsangpet a Sangaili ken Balikbayans. Tunggal maysa ket annongenna ti naikumit a pagrebbenganna ket naurnos iti pannakaipatungpal dagiti maaramid sakbay a nairugi ti programa.

Iti umuna  a paset ti programa ket isu ti panagmartsa (Grand Entrance of Special Guests)  iti uneg ti Complex nga indauluan ni Mayor Edgardo “Ediboy” S. Cobangbang, Jr. ken ni Mrs. Jerlie S. Cobangbang a kapisi ti pusona kasta met a simmaruno da  Gov. Ryan Luis V. Singson ken ni Mrs. Patricia “Pats” H. Savellano nga asawa ti Gobernador. Simmaruno dagiti Presidente iti nadumaduma nga asosasion/organisasion  ken nag-Chairmen iti napalabas a Global Reunion.

Nangipaay ti Welcome Remarks ni Vice Mayor Deogracias Jose H. Savellano. Paset ti panagsaritana iti panangibilangna a  maysa a historikal a pasamak daytoy a naaramid a Global Reunion ditoy Cabugao a nangpabileg ti kultura ken espiritu iti Tema a: “One Cabugao”, a mangipamatmat  iti identidad, solidaridad,  panagkaykaysa ken agtultuloy a panagprogreso dagiti umili.

Nangipaay ti Invocation ni Rev. Fr. Andronico “Sonny”  Pahed, Jr. ket imbuyogna ken iti kaaduan iti nasged a kararag para ken ni Brgy. Captain Eddie  S. Cobangbang, Sr.
Naaramid ti Dinner ket nasagrap dagiti naitallaong  dagiti nabaknang a taraon kabayatan iti panangdanggay dagiti agaasmang nga agsala  dagiti sonata/tokar  nga ipatayab ni Mang Podring Orchestra a namagpikapik iti gundaway dagiti Balikbayans ken dadduma a nagatendar.

Naisaruno ti panangyam-ammo ni Vice Gov. DV Savellano iti kangrunaan a bisita nga isu  ni Governor Ryan Luis V. Singson iti Probinsia ti Ilocos Sur.

Iti panagsaritana, pinadayawan ni Governor Ryan  daytoy a naindaklan a panagtitipon dagiti Cabugaoenians ket imbagana a  makikaysa met itoy a pasamak  ditoy Cabugao. Dinayawna ti napigsa a liderato ni Mayor Ediboy iti historikal a pannakaigannuat ti Global Reunion kasta met iti agtultuloy a  panangipateg dagiti Balikbayans iti ilida ket iti panagsublida ket pakakitaan ti pammategda iti nagtaudanda a lugar  a   maibilang pay ket  a taengda a pagawidanda.

Insupusop ni Gov. Ryan iti mensahena a babaen iti  panagkakammayet iti amin a sektor ita a dumanggay kadagiti proyekto ken programa ti Gobierno Probinsial, mataming  iti benneg iti Online Products, One-Town-One-Product (OTOP), Turismo ken mabigbig  koma ti Ilocos Sur iti Mapa ti Lubong.
Iti Royal March, nagmartsa ni Outgoing Cabugao Global Queen Linda Pahed a binayabay ni Mr. George Pahed;   simmaruno da  Miss Cabugao-Hongkong; Miss Cabugao-Philippines; Miss Cabugao-California; Miss Cabugao-Hawaii; kameng ti Royal Entourage ken iti iseserrek ni Her Majesty Queen Perpetua 1st, (Ms. Perpetua Solanzo-Kojo), Kandidata ti Cabugao Association of Northern California (CANCA).

Nabaetan iti Public Dance sa naipaay ti Plaque of Appreciation ken ni Mayor Edgardo “Ediboy” S. Cobangbang, Jr. iti panangakseptarna ti pagrebbengan a maangay ditoy ti 7th Cabugao Global Grand Reunion ken iti  panagpaayna a Honorary Chairperson. Ngarud, inyawat ni Mr. George Pahed, Outgoing 6th Cabugao Global Reunion Chairman a binayabay ni Engr. Charlie Concepcion iti Plake  ket naited ken ni Mayor Ediboy iti imatang ti kaaduan. 

Iti Coronation Rites, kinoronaan da Gov. Ryan Luis V. Singson  ken ni Ms. Heidi Soller Solanzo ni Queen Perpetua 1st; da met Mayor Ediboy ken ni Mrs. Jerlie S. Cobangbang ken ni Ist Princess Myrna; da met Vice Gov. DV Savellano ken ni Ms. Norma Solanzo ken ni 2nd Princess Bennie; da met Vice Mayor DJ Savellano ken ni Ms. Dina Bonnevie  ken ni 3rd Princess Judith; ken da met  Mr. Simeon Simsiman ken ni Ms. Nancy Nerona ken ni 4rth Princess Michelle.

Naisaruno a naipabuya babaen iti Video iti kaaduan  ti kaipapanan ti:  “Better People, Better Town” a pakabuklan dagiti nagapuanan ti Administrasion ni Mayor Ediboy  iti ili a Cabugao a para iti pagimbagan dagiti umili.

Iti Mensahe ni Mayor Ediboy, kimmablaaw ken nagyaman iti adu a pammati dagiti Balikbayans kenkuana  tapno mairusat  ditoy Cabugao daytoy a taripnong. Pinadayawanna dagiti kameng ti Royal Court, amin  a naitallaong, ni Gov. Ryan, ni Vice Gov. DV, da Board Member Jerry  C. Singson,  BM Tante Oandasan ken ni BM Edgar Yabes agraman dagiti kimmuyog nga  assawa dagitoy nga Opisiales nga imbilang ni Mayor Ediboy a nagtaudan ti pigsa dagitoy nga Opisiales  tapno  makidangdanggayda latta  kadagiti pakaseknan ti ili a Cabugao.

Kalpasan ti Royal Dance, nagsarita  ni Her Majesty Queen Perpetua 1st ket kimmablaaw ken  nagyaman kadagiti Opisiales ti ili a Cabugao sa imbagana a pakaidayawanna ta naikkan iti gundaway a tumulong/bumisita  ditoy ili a Cabugao.  Nangipaay met ti Dance Presentation dagiti asosasion ti  CANCA, COSCA, CSDAH, ken iti Pilipinas (Cabugao).

Kamaudiananna, naaramid ti napaut a  Public Dance sa napagkaykaysaan dagiti Balikbayans  a maangay ti sumaruno a Cabugao Global Reunion  idiay Los Angeles, California inton Hulio 2017. 

Dagiti  Kandidata ti 7th Cabugao Global  Grand Reunion 2014  ket isuda: Ms. Judith Sison Garcia, Philippines; Ms. Michelle Angara, Cabugao Association of Hongkong; Ms. Myrna Guerrero Peralta, Cabugao Sons and Daughters Association of Hawaii (CSDAH);  Ms. Perpetua Solanzo Kojo, Cabugao Association of Northern California (CANCA) ken ni Ms. Benedicta Castillo, Cabugao Organization of Southern California (COSCA).

Nagpaay met a Hosts  da: Derick Gonzales ken ni Namkeen Soller Hameed.  # (Web In-Action)

MAIPAMAYSA A SERBISIO TI SALUN-AT, MASEKNAN TI RHU

Cabugao, Ilocos Sur – Maibatay iti rekord ti Municipal Health Office-RHU Cabugao, Ilocos Sur, agtultuloy a maipapaay ti serbisio ti salun-at iti inaldaw  agraman iti aldaw ti Sabado ken Domingo gapu iti umad-adu a pagkasapulan ti agpaagas kangrunaan iti maladaga, ubbing, agtutubo, nataengan, Senior Citizen ken People with Disability’s (PWDs).

Segun ken ni Dr. Bernardino M. De Gracia, OIC Municipal Health Officer,  naurnos ti pannakaited ti eskediul dagiti Medical Personnel iti RHU agraman iti Lying-in Center a mangatendar ti pagrebbenganda kadagiti umili nga umay  agpaagas nangruna iti bigat ta nakaintek ti Doktor nga agtaming kadagiti masakit.

Kabayatanna, naannayas met a maipatpatungpal ti serbisio iti benneg ti Immunization, Pre-Natal/Family Planning, Medical, Dental ken BP Check-up babaen kadagiti natudingan a Medical Personnel. Maar-aramid met ti pannakamonitor dagiti programa ti LGU-MHO ken ti DOH a pakairamanan  iti benneg ti Nutrision, Kalusugan Pangkalahatan agraman iti Health Care Program  dagiti 4 Ps Children Beneficiaries kadagiti 33 a barangay ti ili.

Dagitoy nga aksion ken inisiatiba ket paset ti naregget a programa ken iti   agtultuloy a pannakaitandudo ti salun-at  ti sapasap babaen iti LGU Cabugao nga idauluan ni Mayor Edgardo “Ediboy” S. Cobangbang, Jr. para iti agdama ken iti masanguanan. # (Web In-Action)

UMUNA NGA ALDAW TI GLOBAL REUNION, NABALLIGI

Cabugao, Ilocos sur – Naaramid ti umuna nga aldaw ti 7th Global Grand Reunion 2014 idi Pebrero 18, 2014 (Martes) iti Tema a: “One Cabugao.”

Naaramid ti Diana iti aglikmut iti Poblasion iti  parbangon dayta a petsa. Naaramid met ti Lunch  iti Cabana Beach Resort and Hotel, Brgy. Pug-os, Cabugao, Ilocos Sur babaen iti panangisagut ni Vice Governor DV Savellano.

CLICK HERE TO VIEW MORE PHOTOS

 Kamalmanna, naaramid ti Liturgical Celebration iti Cabugao Central Park (CCP), Brgy. Bonifacio, Cabugao, Ilocos Sur a nagatendaran dagiti Balikbayans ken iti Pamilia LGU ken dadduma pay a nasinged a bisita. Walo a Papadi ti nagsisinnublat a nangannong ti Nasantuan a Misa nga isuda: Rev. Fr. Moises Andrada II; Rev Fr. Robert Somera; Rev. Fr. Amador “Amy”  Cabaluna; Rev. Fr. Andronico “Sonny” Pahed, Jr.; Rev. Fr. Lovell U. Soller, Rev. Fr. Reginald "Rex" S. Pira; Rev Fr. Lloyd Vincent Somera Sumngat; ken ni Rev. Fr. Felix Costales.

Iti introduksion ni Mrs. Lucila S. Somera, bininsana ti tema ken pateg ti panagtitipon dagiti Cabugaoenians a naggapu iti nadumaduma a pagilian ti lubong a naikonektar iti natibker a Tema: “One Cabugao”.

Nabinggasan iti panagtitipon iti pateg  dagiti naespirituan a panagsarita dagiti Papadi ti Roman Catholic Church a mayataday iti Tema ti panagtataripnong.

Kalpasan ti Nasantuan a Misa, naikanayon ti pannakaaramid ti Welcome Party (Cocktail) iti nasao met la a disso.

Immuna a nagpabuya dagiti naisagana nga Intermission Numbers kangrunaan ti panagkanta dagiti kameng ti Cabugao Cultural  Troupe. 

Iti naangay a programa, impaay ni Rev. Fr. Sonny Pahed, Jr. ti pammendision ken panagkararag. 

Nangited ti Mensahe ni Mayor Edgardo “Ediboy” S. Cobangbang, Jr. Kimmablaaw ken nagyaman kadagiti nagatendar a Balikbayans kasta met dagiti dadduma nga umili a nagbuya  iti umuna a rabii ti Global Reunion.

Innayon ni Mayor Ediboy iti pannakasirmatana iti  balligi  daytoy a panggep  ti panagtitipon. Insupusopna pay a napintas daytoy a pangrugian iti  agtultuloy a panangibinglay dagiti Cabugaoenians nga agnanaed iti ballasiw-taaw para iti proyekto a pagsayaatan ken pagimbagan dagiti kailianda iti ili a Cabugao, Ilocos Sur iti agdama ken iti masanguanan.

Naisaruno ti panagsala dagiti Balikbayans/Bisita  a nangkumpas kadagiti agduduma a tokar ken kanta nga impatayab ti E.C. Jammers Orchestra.

Kabayatanna, makumikom met ti agay-aywan ti linak ken talna nga ibagian ti Kapolisan, BFP ken dagiti kameng ti BPATS  a nangmonitor kadagiti sumrek-rummuar kadagiti ruangan ken kangrunaan ti panagsangpet dagiti bisita ken Balikbayans.

Naregget met ti naipakita a panagtignay dagiti kameng ti Pamilia-LGU a nangsabat ken nangkuyog kadagiti nagsangpet a bisita ken  nangitulod kadakuada kadagiti naisibar a pagtugawanda.

Dagiti Balikbayans a nagatendar ket kameng ti COSCA (Cabugao
Organization of Southern California (COSCA),  Cabugao Association of Northern California (CANCA);  Cabugao Sons and Daughters Association of Hawaii (CSDAH); Cabugao Association of Hongkong ken iti  Pilipinas. # (Web In-Action)

BABOY TI KAADUAN A NAPARTI ITI TAWEN 2013

Cabugao, Ilocos Sur – Segun ken ni Dr. Melvyn Garma Castro, DVM, Municipal Livestock Coordinator ti LGU-Cabugao  ken tumultulong nga aginspeksion a kaaduan iti baboy ti naparti a nakonsumo  ken  naipauraga iti NISTC Public Market iti Tawen 2013. Umabot iti 8,079 a bilang ti nairekord a naparti iti Slaughterhouse ti Munisipio; sumarsaruno ti baka nga addaan ti bilang ti 321 ken maikatlo ti nuang nga addaan ti bilang iti 275 nga ulo.

Innayon ni Dr. Castro a nagdalan amin dagitoy iti inspeksionda  sakbay a nailako/pinagtaraonda   ti bulto ti karne kadagiti konsumidores ti karne. Insupusop ni Dr. Castro a naregget ti panangmonitor ken panangamirisda  ken  dagiti kakaduana nga agtultuloy latta a presko a kanayon kangrunaan dagiti maipauraga a karne a para iti konsumo ti publiko idiay NISTC Public Market. # (Web In-Action)

87th FOUNDATION DAY ANNIVERSARY TI CI, NABALLIGI

Cabugao, Ilocos Sur – Naangay ti 87th Foundation Day Anniversary ti Cabugao Institute, Cabugao, Ilocos Sur idi Pebrero 14-16, 2014 babaen iti Tema: “CI Meeting Challenges In a Changing World.”

Iti Pebrero 14, 2014, naaramid ti Search for Mr. CI IDOL 2014 nga inesponsoran dagiti Host Classes: Class 1964, Class 1974 ken Class 1989. Naaramid pay ti Screening Examination for CI  Scholarship Grants.

Iti Pebrero 15, 2014, naaramid ti Ex-COMELEC Chairman VICTORINO A. SAVELLANO MEMORIAL RUN     a nagpartisiparan dagiti umili ti Cabugao ket tinarayda ti 5-10 Kilometro manipud iti CI Compound (Starting-Finish Line) to Turod-Salomague. Naaramid pay ti Nasantuan a Misa a naidaton kadagiti Deceased Founders, Administrators, Faculty, Parents, Staff and & Students babaen iti panangannong ni Rev. Fr. Felix Costales.  Naisaganad a naaramid ti Cluster Meetings dagiti Host Classes.
Karabiyan dayta a petsa, naangay ti Parents, Alumni and Students (PALS) Night. Ditoy a nangipaay ti panagsarita da  Ret. DENR Region 1 Director Lydia Lopez; Mrs. Josefina Sunio-Rillo ken ni Dr.  Jeanette Cacho-Liwaliw, Ph. D. kas panagsaganadda.
Kalpasan dagiti naiballaet nga Intermission Numbers, napadayawan dagiti  Most  Outstanding Cabugaoenians babaen ken ni Rev. Fr. Andronico Pahed, Jr., manipud iti KABU-ANGAW Foundation.

Nangted met ti Mensahe ni Dr. Cesar  Soller, CIAA Executive Vice President. Napadayawanda  met iti Certificate of Recognition dagiti Host Classes: Class 1964, Class 1974 ken ti Class 1989.

Idi Pebrero 16, 2014, naaramid ti Parada iti pageskuelaan iti aglikmut iti Poblasion.  Nakipagparada met ti nag-Miss 6th GLOBAL REUNION, kameng ti  Cabugao Organization of Southern California (COSCA) ken ti Cabugao Association of Northern California (CANCA)-USA kasta met iti dadduma nga Alumni Groups ken kameng ti Parents Guardian Association ti CI.

Naisaruno ti Playground Demonstration dagiti agad-adal iti malem dayta a petsa. Karabiyanna, naangay ti Coronation Night and Ball. Napadayawan ti 15 a Prinsesa nga inturayan ni Her Majesty Queen RIZALEE 1st  ken nagpaay a Coronators kenkuana da Ex-Mayor Dr. Francisco Sevilleja, Guest Speaker,  agindeg iti Sta. Teresita, Cagayan ken ni Miss Lydia Lopez, Retired DENR Region 1 Director.

Dagiti Board of Trustees ti Cabugao Institute ket dagiti sumaganad: Ret. Judge Efren S. Ubungen, Chairman; Members - Mrs. Helen S. Lazo; Miss Maria S. Rondon; Miss Maria Josefa Athena B. Savellano; Mr. Jeremy S. Seguban; Mr. Bendell S. Tan ken ni Mr. Bobby P. Ubungen. # (Web In-Action)