Cabugao, Ilocos Sur – Nai-turnover ti lima nga Engine Pump (Kubota) kadagiti mannalon a recipient iti proyekto: “Increasing Productivity in Rainfed Areas through Utilization of Rice Modern Technologies” CY 2013-2014 a pakasarakan ti Learning Field daytoy iti Barangay Reppa-ac, Cabugao, Ilocos Sur.
Nai-turnover dagitoy a makina iti imatang ni Mayor Edgardo “Ediboy” S. Cobangbang, Jr. a kaduana ni Vice Mayor Deogracias Jose “DJ” H. Savellano agraman dagiti kameng ti Sangguniang Bayan babaen kadagiti Recipient-Farmers idi Pebrero 7, 2014 iti sango ti Munisipio.
Segun ken ni Mr. Nereo S. Daproza, Municipal Rice Program Coordinator, umabot iti 40 ti bilang dagiti Farmer-Participants ket nagkalima a Cluster ket agsisinsin dagitoy iti Engine Pump nga usarenda a pagpadanum.
Dagiti makina ket impaay ti DA-RFO 1, San Fernando City, La Union ket naited a grant kadagiti benepisiario tapno maparegtada dagiti mannalon a mangipromot iti programa ti DA.
Innayon ni Mr. Daproza nga iti 15 ektarias a saanen a mamulaan kalpasan ti Wet Season Crop (Hunio-Nobiembre) ket namulaan manen ti Mais iti 2nd Crop (Dry Season 2013-2014) ket kaaduannan ti naapit tapno agtultuloy a maprobitsarda iti nasao nga agbakante a taltalon.
Paset ti proyekto iti pannakaangay iti Farmers Field School iti tunggal aldaw ti Huebes ti kada lawas babaen iti panangtarawidwid dagiti Facilitators ti DA-LGU Cabugao nga isuda Mr. Daproza ken ni Mr. Obas Bill Y. Baclig, AT.
Dagitoy nga inisiatiba ket resulta ti naregget a panagkammayet ti DA-RFO 1 nga idauluan ni DA Regional Executive Director Valentino Perdido, Ph. D. ken iti LGU-Cabugao nga idauluan ni Mayor Edgardo “Ediboy” S. Cobangbang, Jr. # (Web In-Action)
No comments:
Post a Comment