Thursday, February 6, 2014

IRRIGATED TI KAADUAN ITA A NAMULAAN

Cabugao, Ilocos Sur – Maibatay iti rekord ti DA-LGU Cabugao, naammuan nga 800 ti bilang ti mannalon a nagtalon kadagiti addaan ti pananumanna a masakupan ti irigasion iti Munisipalidad ti Cabugao iti Dry Season 2013-2014 (Nobiembre-Mayo).

Segun ken ni Mr. Nerio S. Daproza, AT, Municipal Rice Program Coordinator, nga adda bilang ti 125 ektarias a natalon iti Hybrid Rice a sinukay ti 480 a mannalon; 75 ektarias ti Certified Seeds a tinalon ti 300 a mannalon; 5 ektarias ti Good Seeds a trinabaho ti 16 a mannalon.

Innayon ni Mr. Daproza nga adda 7 ektarias ti natalon iti Seed Production nga inasikaso ti 4 a Seed Growers iti dua a barangay. Umabot ti 212 ektarias ti dagup ti amin a  natalon iti Irrigated, Dry Season 2013-2014, segun pay ken ni Mr. Daproza.

Agsipud ta madama pay laeng a maap-apit dagiti naimula  a pagay ket saan pay a masinunuo no mano a sako wenno Tonelada ti kada ektaria ti maapit.

Nupay kasta, manamnama a napintas ti maapit iti agdama maigapu iti pabor ti panawen ken napintas ti pannakaisagana dagiti pagtatalonan iti tulong ti Mechanized Farming nga impaay  ti DA ken ti LGU-Cabugao kasta met kadagiti kabaruanan a Teknolohia ti panagpatanor ti pagay a mait-ited kadagiti mannalon, segun pay ken ni Mr. Daproza. # (Web In-Action)

No comments:

Post a Comment