Cabugao, Ilocos Sur – Maibatay iti rekord ti Rural Health Unit (RHU)-Cabugao, naipatungpal ti “Mass Immunization” kadagiti ubbing nga agtawen manipud 1 agingga iti 5 maikontra iti Kamuras.Segun ken ni Dr. Bernardino M. De Gracia, OIC Municipal Health Officer, impakaammona a naipatungpal daytoy a nasaknap a panagbakuna nga impaaramid ti DOH tapno mapasakbayan iti panagraira itoy a sakit kadagiti amin a lokalidad agraman iti ili ti Cabugao, Ilocos Sur.
Innayon ni Dr. De Gracia a daytoy a naballigi a krusada kontra daytoy a sakit ket gubuay met laeng ti natanipkel a panagkaykaysa dagiti parupa iti Serbisio ti Salun-at nangruna kadagiti barangay ken iti agtultuloy a suporta ti Gobierno Munisipal nga idauluan ni Mayor Edgardo “Ediboy” S. Cobangbang, Jr.
Kabayatanna, insupusop met ni Mrs. Janet Sison, Public Health Nurse ti RHU-Cabugao a pinagbalinda nga “Everyday Immunization” gapu ta adda latta met saan a nakakamakam iti Mass Immunization nangruna kadagiti agnaed iti nauneg a barangay.
Dagitoy nga aksion ken inisiatiba ket resulta ti napintas a koordinasion ti LGU, Barangay ken iti RHU-DOH iti pannakasigud a pannakatiped kadagiti agsaknap a nakaro a sakit a kas iti Kamuras. # (Web In-Action)
No comments:
Post a Comment