Cabugao, Ilocos Sur – Inaldaw a maaramid ti Supplemental Feeding kadagiti Day Care Pupils iti 33 a barangay ti ili a Cabugao, Ilocos Sur iti agdama.Segun ken ni Mrs. Lydia S. Gazmen, MSWD Officer a kaaduanen dagiti Day Care Workers ti immay nagala ti abastoda a bagas iti Munisipio nga impaay iti DSWD Region 1 a mangkomplementar ti programa iti panangnayon ti taraon dagiti babassit nga ubbing nga agad-adal iti barangay.
Iti pannakiuman ti Web In-Action kadagiti Day Care Workers nga immay nagala ti sustento ti ubbing a bagas ket imbatadda a naballigi daytoy a programa ti Munisipio ken ti DSWD ket komkomplementaranda met iti napasnek a panagserbida a mangtaraon ken mangiwanwan kadagiti ubbing nga aywanda tapno naan-anay ti balligi iti panggep ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangpasayaat pay para iti daytoy a programa ti Munisipio. # (Web In-Action)
No comments:
Post a Comment