NABATBATI A SEEDLINGS, MANAYNAYONAN

Cabugao, Ilocos Sur – Maibatay iti rekord ti DA-LGU Cabugao, umabot iti 15,254 nga addaan ti 18 ti klasena a Seedlings ti naiparuar iti Municipal Plant and Nursery nga imatonan ni Mr. Robert S. Savella, AT,  Coordinator iti Tawen 2013.

Ti Mahogany ken iti Manila Palm (Butchina) ti kaaduan a naited kadagiti nagkalikagum nga indibidual, grupo, barangay ken sektor iti Tawen 2013. Dagitoy a seedlings ket naggapu iti 25,494 a napatanor (propagated) malaksid iti bilang dagiti naimasetas manen iti matapogan ti Tawen 2014.

Innayon ni Mr. Savella nga umabot ti 10, 170 a seedlings pay ti nabatbati iti uneg ti Municipal Nursery a mabalin manen a maimula/maruk-atan  para iti masungad a  matutudo a bulan a panag-Tree Planting ti LGU-Cabugao.

Insupusop pay ni Mr. Savella ti agtultuloy a “propagation”  babaen iti itutulong kenkuana ti dua a Job Order Personnel: Mrs. Marjorie C. Castillo ken ni Mrs. Adona S. Agriam nga inaldaw nga  agdalus, agsibog ken agisupot ti daga a pagimulaanda ti bukel.

Dagitoy nga aksion ken inisiatioba ket resulta ti nasaknap a Reforestation Activities a paset ti Clean and Green Program ti Munisipio partikular a maipatungpal kadagiti 33 a barangay ti Munisipalidad. # (Web In-Action)