Cabugao, Ilocos Sur - Kalpasan ti Flag Raising Ceremony ti Pamilia-LGU Cabugao iti Pebrero 17, 2014, impalagip ni Mayor Edgardo “Ediboy” S. Cobangbang, Jr. iti panangrugi ti 7th Cabugao International Global Grand Reunion 2014 iti Pebrero 18 ken agpatingga iti Pebrero 20, 2014.
Inulit ni Mayor Ediboy iti napintas ken makapnek a masarita dagiti Cabugaoenians a kaaduan kadagitoy ti naggapu iti Hawaii, Hongkong, Mainland US ken dadduma pay a pagilian iti ballasiw-taaw a naawis nga umay agatendar kadaytoy a naindaklan a panagtitipon dagiti Balikbayans ken agindeg iti Cabugao ken iti pagilian a Pilipinas.
Gapu itoy, pinagtignay ti Alkalde Munisipal iti naan-anay a puersa ti amin nga Opisina/Departamento ti LGU-Cabugao, Host kadaytoy a dakkel a pasamak, a tumulongda pay kadagiti rebbengna a maisagana para iti tallo nga aldaw nga aktibidad tapno maay-ayo dagiti sangaili iti mapadasanda kadaytoy a panagtitipon-sangalubongan ti Cabugaoenians ditoy ili a Cabugao.
Insupusop pay ti Ama ti Ili a maseknan koma ti amin nga umili a mangipasiar kadagiti sangaili a gagayyemda, kabagianda ken am-ammoda a saan laeng koma iti las-ud ti Poblasion no di pay ket kadagiti barbarangay a kayatda a turongen tapno maapresiarda met dagiti naruay a proyekto/pagsayaatan a gapuanan ti LGU-Cabugao gapu iti napintas a pannakaibanag dagiti pundo a para iti pagimbagan ti sapasap nga umili ditoy Cabugao.
Maysa pay a kangrunaan a panggep iti pannakaangay ti 7th Cabugao Global Grand Reunion ket iti pannakapaadda iti Electronic Library a pakaisagutan dagiti agad-adal iti amin a benneg ken kasta pay met dagiti umili. Addaan ti panagtitipon iti natibker a Tema: “One Cabugao” a mangitunda pay iti ad-adu a panagprogreso ti ili a Cabugao, Ilocos Sur iti agdama ken iti masanguanan. # (Web Situational Report)
No comments:
Post a Comment