HEALTH CENTER, MAIPASDEKTON ITI BGRY.

Cabugao, Ilocos Sur -  Maibatay iti plano ti Departamento ti Salun-at, maigannuat iti masanguanan iti pannakaipatakder ti Balay-Pagagasan kadagiti barangay. Segun ken ni Dr. Bernardino M. De Gracia, OIC Municipal Health Officer ti ili a Cabugao, plano ti DOH babaen iti anamong ti Gobierno Munisipal iti pannakaipatakder  ti agpapada ti langana a pasdek a pakaibalayanto  ti pagagasan ken pakatamingan dagiti addaan iti dadduma nga an-annayen kadagiti aw-away.

Innayon ni Dr. De Gracia nga apaman a maipatungpal daytoy a proyekto ket ma-decentralize ti pannakaited ti sebisio ti salun-at para kadagiti umili iti masanguanan. Daytoy nga addang ket agresulta iti pagnam-ayan dagiti umili ta iti mismo a barangay ti pakaaramidanton  ti dadduma a pannakataming ti salun-atda.

Kabayatanna, insupusop ni Dr. De Gracia a naregget latta ti agtultuloy a  pannakaipaay ti serbisio ti salun-at iti RHU-Cabugao para kadagiti umili. Dagitoy nga aksion ken inisiatiba ket gubuay iti agtultuloy a pannuporta ti LGU-Cabugao nga idauluan ni Mayor Edgardo “Ediboy” S. Cobangbang, Jr. para iti nasalun-at,  produktibo ken naasenso nga umili. # (Web In-Action)