Wednesday, February 12, 2014

PANAGDALUS ITI KALSADA TI POBLASION, NAIGANNUAT

Cabugao, Ilocos Sur – Timmulong iti grupo ti Clean and Green Program  ti Munisipio a nagdalus ken nag-pruning kadagiti sanga ti kayo kadagiti kalsada ti Poblasion nangruna kadagiti Processional Routes tapno naan-anay ti pannakalinis ken pannakapapintas ti buya ti aglawlaw.

Segun ken ni MENRO Edgar S. Balangatan, AT, agak-akem a dadaulo ti grupo a kalpasan a maiwakasda iti agsumbangir ti National Highway manipud iti Brgy. Sagayaden nga  agpatingga iti Brgy. Pug-os ket  nakikoordinarda kadagiti barangay ti Poblasion tapno tumulongda nga agdalus ken agikkat iti makasipar a sanga ti kayo iti igid ti kalsada.

Innayon ni MENRO Balangatan a monmonitorenda pay iti Cleanliness and Beautification dagiti pito a Coastal Barangays a kangrunaan a pagpasiaran  dagiti  Balikbayans/bisita iti summer months babaen iti pannakikammayetda kadagiti Opisiales ti barangay kadagitoy a lugar. Timmulongda pay a nangpalinis iti agsumbangir a paset ti National Highway iti agpa-Port Salomague.

Dagitoy nga aksion ken inisiatiba ket paset ti Direktiba ti Local Chief Executive ti ili  iti agtultuloy a pannakaipakat ti panagdaldalus ken panangpapintas  iti aglawlaw iti ili a pagsayaatan ken pakairanudan met laeng iti sapasap. # (Web In-Action)

No comments:

Post a Comment