DUA NGA ALDAW A PIESTA TI BARANGAY BONIFACIO, NASELEBRARAN!

Cabugao, Ilocos Sur – Naaramid ti Parada ti bumarangay ken dadaulo ti Barangay Bonifacio iti aglikmut ti Poblasion idi Nobiembre 29, 2018.

Karabiyanna, nakoronaan ti Reyna ti Rural Improvement Club a nangesponsor kadayta nga umuna  a rabii ti panagpiesta ti Barangay Bonifacio  bababen iti panangidaulo ni Miss Marietta S. Cruz.

Sakbayna, naaramid ti Inter-Purok Basketball Tournament idi Nobiembre 3-18, 2018.

Adu ti nasangaili dagiti lumugar a nakipiesta agraman dagiti Opisiales ti Ili nga idauluan ni Mayor Josh Edward S. Cobangbang.

Iti kaaldawan ti Piesta, nainagoraran ti kabarbaro a Multi-purpose Building ti barangay.

Naaramid dagiti paay-ayam  iti kaaldawan ti Nobiembre 30, 2018 kas iti Kite Flying; Sack Race; Palosebo ken tinniliwan ti burias a nangray-aw ken nangparagsak ti piesta.

Naaramid met ti Diana; Misa; Floral Offering; libre a pukis; libre a dental ken panagpadaya (salo-salo) ti barangay iti bigat ti kaaldawan ti Piesta.

Nangted ti Mensahena ni Mayor Josh Edward S. Cobangbang. Kimmablaaw ken dinayaw ni Mayor Josh Edward dagiti  napipintas a naipabuya ken kinaadu ti nakipiesta. Kalikagumna a taginayonen koma dagiti lumugar ti kastoy a kinaurnos ken panagkaykaysada a mangirubuat ti aktibidades ti Piestada.

Makaparay-aw met dagiti naipabuya nga intermission number iti nagsaruno a rabii ti Piesta.

Naibabaet iti pannakaibasa dagiti nabunot a nagan a nagasat a nakaawat ti papremio iti Raffle Draw kas iti Cash; Cellphones ken dadduma pay iti nagsaganad a rabii.

Naragsak a napan nangawat ti premio dagiti nabunot ti numeroda.

Nasangaili met a  nagited ti Sash, Bouquet, Trophy ken Coronets  dagiti runner-ups  iti rabii ti Piesta da  Vice Mayor DJ Savellano; SBM Danny Q. Gazmen;  Mrs. Jerlie Seguban-Cobangbang; SBM Vicky S. Serna;  SBM Dr. Jemaima S. Tan-Yee;  SBM Atty. Bryan Jett S. Pano; SBM Josefina S.  Vallejo; SBM  Atty. Randy Baniaga G. Kinaud; SBM Jayhan Alcid-Tan ken ni SBM Dodgie Santella.

Adu  met ti nakiragragsak a   Balikbayans  ken  tattao a nagramut ti Barangay Bonifacio nga agnanaeden   iti sabali a luglugar.

Da Mayor Josh Edward ken ni ni Atty. Janice Santella  ti nagisaad iti Korona  iti Reyna ti RIC ken ni Miss Bonifacio 2018. Napusgan met a nagisaad dadduma a sangaili kadagiti pammadayaw a maisaad a kas iti sash; boquet; ken trophy.

Pinagyamanan met ti Barangay Bonifacio nga idauluan ni Brgy. Captain Valentin S. Tuyor, Jr. dagiti timmulong a lumugar; nakipiesta ken nangesponsor kadagiti kasapulan ken  aktibidades a nangparagsak iti dua nga aldaw a panagpiesta ti Barangay Bonifacio, Cabugao, Ilocos Sur ita a Tawen 2018. # (Web Team)