Cabugao, Ilocos Sur – Agtultuloy a maigannuat ti panagdaldalus/panagpapintas ti buya iti aglawlaw babaen iti panangiyusuat dagiti pannakabagi ti Munisipio iti iyaasideg ti petsa ti Paskua 2018 ken panagsangpet dagiti Bakasionista, Balikbayan ken Turista ditoy ili a Cabugao, Ilocos Sur.
Tartarawidwidan dagiti LGU Personnel nga agtitinnulong ken agtultuloy nga agdalus kadagiti pampubliko a disso a kas iti Parke, Plaza, Government Center ken iti National/Provincial Highway tapno agtultuloy a napintas ti buya iti aglawlaw ken nadalus iti mapagnaan dagiti agpasiar.
Kabayatanna, naiplastaren ken maar-aramiden dagiti mayannatup a dekorasion para iti pannakaselebrar ti Paskua 2018 iti biang ti Munisipio kadagiti umisu a pakaipananda kangrunaan iti las-ud ti Cabugao Central Park (CCP) a kas iti napagsilawen itay nabiit a Higante a Christmas Tree ken nabagayan iti pannakaarkos kadagiti suli ti Parke ken naikkanda iti narimat a silaw a mangdayas iti aglawlaw ti Parke nangruna iti rabii.
Mataginayon iti napintas a kooperasion dagiti pannakabagi ti LGU-Cabugao a mangipatungpal kadagitoy a trabaho ket naballigi ti pagbanagan dagiti trabaho ken programa a mailunsad iti salinong ti Gobierno Lokal iti ili a Cabugao nga idauluan ni Mayor Josh Edward S. Cobangbang iti pannakausar dagiti pampubliko a pasilidad a para iti selebrasion ti Paskua 2018.
Kabayatanna, mairamraman iti agenda dagiti NGOs ken dadduma nga Asosasion kadagiti angayenda a mitingda dagiti mayeskediul nga aktibidadesda a pagselebrarda iti Paskua 2018. Iti biang ti Munisipio, napagsasaritaanda metten iti asosasion dagiti empleado iti panagselebrarda iti Paskua 2018. # (Web Situational Report)
No comments:
Post a Comment