Cabugao, Ilocos Sur – Naangay ti pannakaselebrar ti Christmas Party 2018 iti Local Government Unit (LGU- Cabugao) idi karabiyan ti Disiembre 21, 2018 iti Cabugao Cultural and Sports Complex, Brgy. Rizal, Cabugao, Ilocos Sur a nagatendaran dagiti Empleado ken Municipal Officials nga idauluan ni Mayor Josh Edward S. Cobangbang.
Sakbayna, nagatendar ti Pamilia-LGU iti naaramid a Misa ti Simbang Gabi iti Cabugao Catholic Church. Naisaganad ti pannakaangay ti panagrambak iti Sports Complex. Kalpasan ti pannakaidaton ti Kararag ket naluktan ti programa. Nagkikinnablaaw ken nagyaman ti Pamilia LGU a nagtitipon a nangrambak iti selebrasion ti pannakaiyanak ti Naindaklan a Mesias.
Naaramid ti panangsango ti Pamilia-LGU iti naisagana a pagtaraon sakbay a naangay ti paay-ayam ken Team Presentations ken iti Raffle Draw a nangabakan dagiti nabunot a numero iti agkakapateg a premio a kas iti Flatiron; Desk Fan/Stand Fan; ken TV.
Nag-mensahe ni Mayor Josh Edward S. Cobangbang. Kimmablaaw, nagyaman ken pinagyamananna iti maipakpakita a kinaragsak ti panagselebrar iti Pamilia-LGU agraman dagiti bisitas ta kangrunaan a napateg iti panagtitiponda ket iti panagkaykaysada a mangrambak iti pannakayanak ti Mesias.
Nagyaman ti Ama ti Ili iti pannakaisagana daytoy a tinawen a panagselebrar dagiti Empleado.
Bininsa ti Ama ti Ili ti pateg ti panangiburay ti Sagut ita a Paskua a kas maysa a napateg a ramit iti panagkikinnaawatan para iti nakaysa a kagimongan nga umili ti Cabugao, Ilocos Sur.
Simmaruno ti pannakaipresentar iti sango dagiti Empleado ti LGU-Cabugao a nakagteng iti kapaut ti tawen iti serbisio a pinadayawan ti Civil Service Commission (CSC) manipud iti nakadanonen iti tawen a panagretiroda ken kaadu iti tawen ken kinapudnoda iti panagserbisioda.
Indauluan ni Mayor Josh Edward a kaduana dagiti Opisiales ti Ili iti nagiyawat ti Sertipiko ti Pammadayaw kadagiti Retirees/Awardees.
Kaskasdi met nga indauluanna ti nagbunot kadagiti na-raffle a numero a nakagun-odan dagiti nangabak nga LGU Personnel kadagiti napapateg a Papremio.
Naragsak ken nagyaman dagiti Empleado a nabunot ti naganda iti Raffle.
Naaramid pay ti pannakapadayaw dagiti Empleado a naikontes iti “2018 Pagwadan Ka Award” a proyekto ti HRMO-LGU Cabugao ket ni Ms. Perlita S. Suetos, Revenue Collection Clerk II ti NISTC iti napili a 2018 Pagwadan Ka Awardee "Best Employee of the Year" ket ni met Mr. Noriel S. Pines iti NISTC-Public Market iti nangabak a “Pagwadan Ka Awardee”, Job Order of the Year 2018.
Nakikaysa iti selebrasion da SBM Danny Q. Gazmen; SBM Dr. Jemaima S. Tan-Yee; SBM Vicky S. Serna; SBM SBM Josefina S. Vallejo; ABC President Thaddeus “Teddy” U. Soller; MPDC/Budget Officer Florante S. Jara; Municipal Engineer Crescencio Marcos C. Formoso; SB Secretary Maxfel S. Suboc ken dagiti amin a Department Heads/Section Chiefs iti LGU-Cabugao.
Nakipagselebrar met da Former Mayor Edgardo “Ediboy” S. Cobangbang, Jr. ken ni Mrs. Jerlie Seguban-Cobangbang agraman dagiti annakda. # (Web In-Action)
No comments:
Post a Comment