160 A BAGS TI LASONA, MAIWARWARAS KADAGITI ONION GROWERS

Cabugao, Ilocos Sur -  Naisangpet manen ti nainayon a bags ti lasona (Batanes) babaen ti DA-LGU idi Enero 19, 2013 ket aganayen  a 160 bags aminen ti naisangrat a maiwaras kadagiti onion growers nga agtarigagay nga agmula itoy a panawen ti panaglalasona. Tunggal bag ket pakabuklan ti 20 kilos a lasona (Batanes) ken maisublinto met laeng ti bumulod nga agmula kalpasan a makaapit.
Iti pannaki-amad ti Web In-Action iti Enero 21, 2013, imbatad ni Mrs. Ester P. Aguimbag, Municipal HVCDP Coordinator a manaynayonan ti bilang dagiti agaplikar nga agmula ti lasona manipud iti 12 nga immuna a nagtarigagay. Manaynayonan met dagiti  bilang ti 5 a barangay nga immuna a naggapuan ti  nagaplikar nga agmula ti lasona.

Idi Enero 17, 2013, mismo a ni SB Member Benedict M. Savellano, Committee Chair on Agriculture ti tinudingan   ni Mayor Edgardo “Ediboy  S. Cobangbang, Jr. a nangiyawat ti bin-i ti lasona iti 12 nga onion growers manipud iti 5 a barangay. Iti Enero 21, 2013, naitultuloy a naited dagiti bin-i  ti lasona kadagiti  dadduma pay nga onion growers nga immay iti Munisipio a nakadamag kadaytoy a  pannakaited ti bin-i. Inimatangan da Mrs. Ester P. Aguimbag AT/HVCDP Coordinator ken Municipal Agriculturist Zenaida S. Andrada ti pannakaiwaras dagiti naruk-atan a bin-i.

Ti agtultuloy a  pannakaitandudo ti panagmula kadaytoy a naipanawen a  cash crop  ket paset ti prayoridad a programa ti Agrikultura  ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno  maital-o  ti produksion   dagiti mannalon a mangnayon pay ti matgedanda ken pagbiaganda. # (Web In-Action)