Wednesday, January 9, 2013

SUMIG-AT TI DAM-EG, UMAD-ADU TI MAILAKO A NATENG


Cabugao, Ilocos Sur – Iti agtultuloy a panangpasimpa ti LGU-Cabugao ti pagyanan dagiti agibiahe/agilako ti nateng iti igid ti Kalsada  Nasional (amianan ti 2 B Grocery), umad-adu met dagiti vegetable growers/traders nga agisada/agibiahe iti inaldaw  iti natengda a naisupot ti selopin ken  naikarton kas iti kamatis, sili (jango), taban, tabungaw, bunga ti marunggay, tarong ken paria a maibiahe idiay Urdaneta, Pangasinan  ken Balintawak, Quezon City no agpaabagatan ken mapan idiay Gonzaga ken Tuguegarao, Cagayan no agpaamianan.

Iti pannaki-amad ti Web In-Action iti Enero 9, 2013, imbatad dagiti babbai a Vegetable Traders a katiempuan ti nateng ita ta masigsig-atanen ti daga ket daytoy ti kayatan dagiti klase ti nateng a nadaras a malako kadagiti  merkado. Mangipaneknek ti yaay dadanon ditoy Cabugao  dagiti trakan nga aggapu iti Manila ken Pangasinan nga agkompra iti nateng.

Insupusop pay dagiti Traders iti pammatida a pumintas latta  ti merkado ti lakoda gapu ta karkardayo  a mapasamak ti “oversupply” a mangpalaka ti presio gapu ta adu ti lugar a pagsayasayan ti produksion uray kadagiti kabangibang nga ili ti umuna a distrito  agingga idiay Vigan City a mapaglakuanda.

Daytoy met ti pinpinsaren ti Cabugao Vegetable Growers and Producers Association nga idauluan ni Kagawad Armando Azcueta a babaen ti tulong ti DA ken LGU ket awanen ti panagressat ti panagmulada ti nateng. Pabor pay ketdi  para iti off-season planting kadagiti mannalon nangruna no maluktan ti Trading Post ken Cold Storage a proyekto ti LGU-Cabugao iti sirmata ni Mayor Edgardo “Ediboy” S. Cobangbang, Jr. a mangpadur-as  pay ti kasaaad dagiti agmulmula/agnegnegosio  ti nateng iti ili a Cabugao. # (Web Situational Report)

No comments:

Post a Comment