AGKAKAMANG TI SEMENTADO A DALAN TI BARANGAY LIPIT

Cabugao, Ilocos Sur – Maysa ti Barangay Lipit a  mabenepisiaran iti nam-ay nga ipaay ti  naitultuloy a nakongkreto a pagdalanan ti  Provincial Road nga agungto iti Barangay Nagsincaoan.

Maitultuloy latta met ti pannakasemento dagiti dalan a kumamang iti purok ken sitio. Iti pannaki-amad ti Web In-Action iti Enero 19, 2013, impeksa  ni Brgy. Captain Bernardo Salom ken ti Konseho-na agraman dagiti kalugaranna iti naan-anay a panagyamanna iti Gobierno Munisipal nga idauluan ni Mayor Edgardo “Ediboy” S. Cobangbang, Jr. a nangilungalong iti pannakatungpal dagitoy a nangayed nga arapaap-da iti Barangay Lipit.

Iti Sitio Labut, Brgy. Lipit, naragsakda a sangkapurok ta naikkanda iti napintas a pagdalananda.

“Napintas pay ti panagpupurok no nasayaat  ti pagpagnaan a rummuar ken kumamang iti pagtatalonan. Agyamankami unay,” insupusop met ni Mr. Manuel Pacpaco, agindeg ditoy a purok.

Ti agtultuloy a pannakapasayaat dagiti kalsada ket prayoridad a programa ti LGU-Cabugao tapno agnam-ay dagiti lumugar ken naannayas ti panangiruarda kadagiti   produktoda para iti pagbiaganda. # (Web In-Action)