Cabugao, Ilocos Sur – Iti pannakiuman ti Web In-Action idi Agosto 10, 2013, impakaammo ni Mr. Marciano Raciles, Jr. Presidente, Cabugao Livestock Traders Association a puminpintas ti transaksion iti nagbaetan dagiti Koridor ken aggatang a taga-ruar. Innayon ni Mr. Raciles a bunga daytoy ti napaingetan a pagannurotanda a saan a mabalin a mapasamak iti transaksion iti ruar ti Dayo ta ditoy ti pakaisentruan iti amin nga animales a madisponer para iti aniaman a pakaiyusaranda.
Iti agtultuloy a panagbuelo ti Dayo, insupusop ni Mr. Raciles a posible nga agkalikagumda manen ti nayon ti pundoda nga agtultulid tapno masustener ti panaggatangda ken maibinglayan met dagiti dadduma pay a saan a makaal-ala a kameng nga itan ket nareggetda metten a makikammayet iti operasion ti Dayo.
Iti dayta a kaaldawan ti dayo, nabun-as ken nalapsat latta dagiti naidayo a nuang ken baka.
Dagitoy nga aksion ken inisiatiba ket bunga ti napintas a panagkadua ti asosasion kadagiti mangtartarabay nga Ahensia a kas iti LGU-Cabugao nga idauluan ni Mayor Edgardo “Ediboy” S. Cobangbang, Jr. ken iti Gobierno Probinsial iti Ilocos Sur. # (Web In-Action)
No comments:
Post a Comment