Cabugao, Ilocos Sur – Simmangbay ti grupo ni Police Senior Superintendent Jemar D. Modequillo Provincial Director iti PNP Ilocos Sur iti ili a Cabugao, Ilocos Sur tapno maangay iti panagkortesiana iti Opisina ni Mayor Edgardo “Ediboy” S. Cobangbang, Jr. ken iti pannaki-dialog daytoy kadagiti Opisiales ti Barangay ken Barangay Tanod/Chief Tanod ken BPATS iti 33 a barangay ti ili ti Cabugao, Ilocos Sur idi Agosto 12, 2013 ket naangay ti Dialog iti Municipal Conference Building.
Immuna a nagsarita ni Police Inspector William N. Nerona, Chief, Municipal Police Station, Cabugao, Ilocos Sur ket naragsakan a nangipeksa ta bimmisita met ti kabarbaro a PNP Provincial Director tapno mapapigsa ti puersa ti PNP ken maibinsana met dagiti programa ti PNP- Ilocos Sur kangrunaan iti pannakapagtalinaed ti linak ken talna ti Probinsia.
Kangrunaan a bininsa ni PD Modequillo ket iti kaadda iti “ugnayan” koma ti kapolisan iti amin a sektor kangrunaan kadagiti Opisiales ti ili ken barangay nga akin-kabisado kadagiti tao ken lugarda. Nangibinglay pay ti Provincial Director kadagiti nasamay nga addang iti panangisayangkatan ti panagaresto, panangrisut kadagiti babassit a problema a saanen a dumanon iti Kuerpo ti Polisia ken pagluglugaran dagiti law enforcers no adda napasamak a krimen. Ingunamgunam pay ti Opisial iti naan-anay a panagtitinnulong ken kinadisiplina ti kapolisan iti pannakilangenda kadagiti sibilian tapno mamantener ti respeto ti tunggal maysa ket agbalin a “friendly environment” ti barangay, ili ken ti probinsia a ditoy ket nawaya nga aggunay dagiti umili ken mangipatungpal kadagiti aramidda a pagsayaatan ti pamiliada, para iti kaaduan ken iti Gobierno.
Naikkan met ti gundaway a nagsarita ni Brgy. Captain Edgardo S. Cobangbang, Sr. ket kimmablaaw ken nagyaman ti Kapitan kadagiti padamag ken palagip ti Provincial Director. Nangted met iti ababa a mensahe ni ABC President Teddy U. Soller a naitaripnong iti nasao a dialog.
Kalpasan ti panagsarita dagiti kangrunaan a mangipaay iti kapanunotanda ket naangay ti Open Forum a tinarawidwidan ni COP Nerona. Nasungbatan a naimbag dagiti saludsod dagiti Kapitanes a nangited ti pakaseknanda ket naballigi ti resulta iti naaramid a dialog. # (Web In-Action)
No comments:
Post a Comment