Cabugao, Ilocos Sur – Naiyawaten dagiti Tseke nga agbalor ti Sangaribu ket Lima Gasut (P1,500) ti tunggal maysa iti 25 nga agtutubo a nangipaay ti serbisiona iti Summer Job Program nga inesponsoran ti Department of Labor and Employment (DOLE)-Vigan City ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. itay napalabas a Summer Vacation 2013.
Daytoy a kantidad ket paset ti 40% a counterpart ti DOLE iti pannakabayad ti serbisio dagiti nadakamat nga agtutubo. Sakbayna, inteden ti LGU-Cabugao ti pakabuklan ti 60% ti gatad a pannakabiangna iti daytoy a nadakamat a programa kadagitoy nga agtutubo.
Inawat dagiti Summer Job Participants ti Tseke-da manipud ken ni Mayor Ediboy iti mismo nga Opisina ti Ama ti Ili ken timmarabay ken inimatangan dagiti Staff ken Personnel ti Human Resources Management Office (HRMO)-LGU Cabugao nga idauluan ni Ms. Teresita Maximina S. Sison.
Daytoy a programa ti labor ket nailungalong babaen iti panagkammayet dagiti nadakamat nga Ahensia ken Gobierno Lokal tapno maipaayan ti trabaho dagiti agkasapulan nga agtutubo iti lokalidad kas pangrugianda nga agsalukag para iti panagadal ken pagsayaatanda. # (Web In-Action)
No comments:
Post a Comment